ការវាយប្រហាររបស់អ៊ីស្រាអែល បានសម្លាប់មនុស្សជិត ១០០នាក់នៅដែនដីហ្កាហ្សា កាលពីថ្ងៃអាទិត្យ (១៧ វិច្ឆិកា) ខណៈបន្តការទម្លាក់គ្រប់បែកយ៉ាងខ្លាំងក្លានៅតំបន់កណ្តាលរដ្ឋធានីប្រទេសលីបង់ ជាទីដែលក្រុមហេសបូឡា បញ្ជាក់ពីការស្លាប់របស់អ្នកនាំពាក្យខ្លួន ឈ្មោះថា ម៉ូហាម៉េដ អាហ្វីស (Mohammed Afif) នៅក្នុងការវាយប្រហារលើស្រុក រ៉ាស អាល់-ណាបា (Ras al-Nabaa) នៃទីក្រុងបេរូត។

អ៊ីស្រាអែល បានប្រយុទ្ធគ្នានៅលើសមរភូមិមុខពីរចាប់តាំងពីខែកញ្ញា មក ដោយបានបង្កើនការវាយប្រហារលើក្រុមហេសបូឡា ដែលគាំទ្រដោយអ៊ីរ៉ង់ នៅក្នុងលីបង់ បន្ទាប់ពីមានការប៉ះទង្គិចគ្នាឆ្លងព្រំដែនជិតមួយឆ្នាំ រួមជាមួយនឹងសង្គ្រាមរបស់ខ្លួនលើក្រុមហាម៉ាស នៅតំបន់ហ្កាហ្សាស្ទ្រីប។

នៅក្នុងអំពើហិង្សាចុងក្រោយបង្អស់នៅដែនដីហ៊ុមព័ទ្ធហ្កាហ្សា ការិយាល័យប្រព័ន្ធផ្សព្វផ្សាយរបស់ក្រុមហាម៉ាស បាននិយាយកាលពីថ្ងៃអាទិត្យថា យ៉ាងហោចណាស់ជនជាតិប៉ាឡេស្ទីនចំនួន ៩៦នាក់ ត្រូវបានសម្លាប់ដោយការទម្លាក់គ្រាប់បែករបស់អ៊ីស្រាអែល នៅភាគខាងជើងនិងកណ្តាលហ្កាហ្សាស្ទ្រីប ក្នុងរយៈពេលប៉ុន្មានម៉ោងកន្លងមកនេះ។

ក្នុងជួរមុខទីពីររបស់អ៊ីស្រាអែលនៅភាគខាងជើង ប្រព័ន្ធផ្សព្វផ្សាយរដ្ឋលីបង់ បាននិយាយថា ការវាយប្រហាររបស់អ៊ីស្រាអែល ទៅលើស្រុក Ras al-Nabaa បានសម្លាប់មនុស្សជាច្រើននាក់។ ផ្សែងយ៉ាងក្រាស់បានហុយឡើងលើជាយក្រុងភាគខាងត្បូង ជាទីដែលអាកាសយានដ្ឋានអន្តរជាតិតែមួយគត់របស់ប្រទេសលីបង់ ស្ថិតនៅ៕