ក្រុមពន្លត់អគ្គិភ័យនៅទីក្រុងញូវយ៉ក បាននិយាយកាលពីថ្ងៃអាទិត្យ (១៧ វិច្ឆិកា) ថា ការជម្លៀសដោយស្ម័គ្រចិត្តក្នុងពេលមួយយប់ បានជួយពួកគេការពារលំនៅឋានជាង ១៦០ខ្នង ពីចំហេះព្រៃ ដែលនៅតែបន្តស្ថិតក្នុងកម្រិតគ្រោះថ្នាក់នៅជិតព្រំដែនរដ្ឋ ញូវ ជើស៊ី (New Jersey) ខណៈមន្ត្រីជាច្រើននៅភាគឦសានកំពុងទប់ទល់នឹងចំហេះតូចៗរាប់រយកន្លែងក្នុងស្ថានភាពស្ងួតហួតហែង និងខ្យល់បក់ខ្លាំង។

សហគមន៍នានាក្នុងតំបន់ ញូវអ៊ីងលែន (New England) បានទប់ទល់ជាមួយនឹងកំណើននៃចំហេះស្រដៀងគ្នានេះ ហើយផ្នែកជាច្រើននៃភាគឦសានរបស់អាមេរិក នៅតែស្ថិតក្រោមការជូនដំណឹងនៃគ្រោះថ្នាក់របស់ចំហេះនៅចុងសប្តាហ៍នេះ។

នៅទូទាំងប្រទេស មានតែរដ្ឋកាលីហ្វ័រនីញ៉ា ប៉ុណ្ណោះបានទប់ទល់យ៉ាងល្អប្រឆាំងនឹងចំហេះទំហំ ៨៣គីឡូម៉ែត្រក្រឡា នៅក្នុងតំបន់ វែនធូរ៉ា (Ventura) ដែលបានបំផ្លាញសំណង់ជាង ២៤៥កន្លែង ភាគច្រើនជាលំនៅឋាន ខណៈអណ្ដាតភ្លើងត្រូវបានគ្រប់គ្រង ៩៥%។

អ្នកនាំពាក្យក្រសួងឧទ្យានទីក្រុងញូវយ៉ក លោក Jeff Wernick បាននិយាយថា ពុំមានសំណង់ណាមួយមានគ្រោះថ្នាក់ទេ គិតត្រឹមរសៀលថ្ងៃអាទិត្យ (ពេលវេលានៅសហរដ្ឋអាមេរិក) ខណៈក្រុមពន្លត់អគ្គិភ័យ បន្តការងារយ៉ាងសស្រាក់សស្រាំ ហើយការជម្លៀសដោយស្ម័គ្រចិត្តនឹងនៅបន្តយ៉ាងហោចណាស់រហូតដល់ថ្ងៃចន្ទ (១៨ វិច្ឆិកា) នេះ៕