មេធាវីតំណាងឲ្យក្រុមសិទ្ធិមនុស្សប៉ាឡេស្ទីន នៅថ្ងៃចន្ទ (ទី១៨ ខែវិច្ឆិកា) នេះ បានប្រាប់តុលាការទីក្រុងឡុងដ្រ៍ថា ប្រទេសអង់គ្លេសកំពុងអនុញ្ញាតឲ្យគ្រឿងបន្លាស់មួយចំនួនរបស់យន្តហោះចម្បាំង F-35 ត្រូវបាននាំចេញទៅកាន់ប្រទេសអ៊ីស្រាអែល បើទោះបីទទួលស្គាល់ថា ពួកវាអាចត្រូវបានប្រើប្រាស់ដោយបំពាននឹងច្បាប់មនុស្សធម៌អន្តរជាតិ នៅក្នុងតំបន់ហ្កាហ្សាក៏ដោយ ។

ដោយមានមូលដ្ឋាននៅតំបន់ West Bank អង្គការ Al-Haq ដែលរបាយការណ៍របស់ខ្លួនបានចោទប្រកាន់ថា មានការរំលោភសិទ្ធិដោយអ៊ីស្រាអែល និងអាជ្ញាធរប៉ាឡេស្ទីន កំពុងចាត់វិធានការផ្លូវច្បាប់ប្រឆាំងនឹងក្រសួងទទួលបន្ទុកធុរកិច្ច និងពាណិជ្ជកម្មរបស់ចក្រភពអង់គ្លេស នៅតុលាការជាន់ខ្ពស់ទីក្រុងឡុងដ្រ៍។

គួរបញ្ជាក់ថា អ៊ីស្រាអែលត្រូវបានចោទប្រកាន់ពីបទរំលោភច្បាប់មនុស្សធម៌អន្តរជាតិ ក្នុងសង្គ្រាម នៅតំបន់ហ្កាហ្សា ដោយការិយាល័យសិទ្ធិមនុស្សរបស់អង្គការសហប្រជាជាតិ ដែលបាននិយាយថា ជិត ៧០ភាគរយនៃអ្នកស្លាប់ដែលខ្លួនបានផ្ទៀងផ្ទាត់ គឺជាស្ត្រី និងកុមារ ជារបាយការណ៍ដែលត្រូវបានអ៊ីស្រាអែលច្រានចោល។

ចំណែកករណីរបស់អង្គការ Al-Haq កើតមានឡើង បន្ទាប់ពីចក្រភពអង់គ្លេស កាលពីខែកញ្ញា បានសម្រេចផ្អាកអាជ្ញាប័ណ្ណនាំចេញអាវុធចំនួន ៣០ ក្នុងចំណោម ៣៥០អាជ្ញាប័ណ្ណ ទោះបីជាខ្លួនបានលើកលែងការនាំចេញដោយប្រយោលនៃគ្រឿងបន្លាស់របស់យន្តហោះ F-35 ដោយលើកឡើងពីផលប៉ះពាល់លើកម្មវិធី F-35 សកលក៏ដោយ។

អង្គការ Al-Haq អះអាងថា ការសម្រេចនេះ គឺខុសច្បាប់ ព្រោះមានហានិភ័យច្បាស់ណាស់ ដែលយន្តហោះចម្បាំង F-35 អាចត្រូវបានប្រើប្រាស់ ដោយបំពានច្បាប់មនុស្សធម៌អន្តរជាតិ៕