សមាជិកក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទ បានអំពាវនាវ ឱ្យបង្កើនជំនួយដើម្បីបានទៅដល់ប្រជាជនដែលត្រូវការជំនួយនៅក្នុងតំបន់ហ្កាហ្សា ដោយបានព្រមានថា ស្ថានភាពនៅក្នុងតំបន់ហ៊ុមព័ទ្ធប៉ាឡេស្ទីនមួយនេះ កាន់តែធ្លាក់ចុះធ្ងន់ធ្ងរ។

រដ្ឋមន្ត្រីការបរទេសអង់គ្លេស លោក David Lammy បាននិយាយថា តម្រូវការចាំបាច់ គឺត្រូវ «បង្កើនជំនួយ» ចូលទៅដល់តំបន់ហ្កាហ្សា ជាកន្លែងដែលប្រជាជនភាគច្រើនក្នុងចំណោមប្រជាជន២,៣ លាននាក់បានភៀសខ្លួនចេញ ហើយមន្ត្រីសុខាភិបាលរបស់តំបន់ហ៊ុមព័ទ្ធនេះ បាននិយាយថា ប្រជាជនប៉ាឡេស្ទីនជាង ៤៣.៩២២នាក់ ត្រូវបានសម្លាប់ក្នុងការវាយលុករបស់អ៊ីស្រាអែល។

លោក Lammy និយាយថា ស្ថានភាពកំពុងជួបភាពអន្តរាយ ហើយនិយាយដោយត្រង់ទៅ វាកាន់តែធ្ងន់ធ្ងរទៅៗ មិនប្រសើរនោះទេ។ រដូវរងាមកដល់ហើយ គ្រោះទុរភិក្សក៏ជិតមកដល់ ហើយរយៈពេល៤០០ថ្ងៃក្នុងសង្រ្គាមនេះ វាពុំអាចទទួលយកបានទាំងស្រុងដែលថាវាពិបាកជាងពេលណាៗទាំងអស់ ដើម្បីទទួលបានជំនួយចូលទៅក្នុងតំបន់ហ្កាហ្សា។

ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិ លោកស្រី Linda Thomas-Greenfield បាននិយាយទៅកាន់ក្រុមប្រឹក្សាសន្តិសុខថា ទីក្រុងវ៉ាស៊ីនតោនកំពុងឃ្លាំមើលយ៉ាងដិតដល់នូវរាល់សកម្មភាពរបស់អ៊ីស្រាអែល ដើម្បីធ្វើឲ្យប្រសើរឡើងស្ថានភាពសម្រាប់ប៉ាឡេស្ទីន។

លោកស្រី និយាយថា អ៊ីស្រាអែល ត្រូវតែមានចំណាត់ការបន្ថែមជាបន្ទាន់ ដើម្បីកាត់បន្ថយស្ថានភាពមនុស្សធម៌ដ៏មហន្តរាយនៅក្នុងតំបន់ហ្កាហ្សា។

រដ្ឋបាលរបស់លោកប្រធានាធិបតី Joe Biden បានសន្និដ្ឋានក្នុងខែនេះថា អ៊ីស្រាអែលបច្ចុប្បន្ន ពុំបានរារាំងជំនួយចូលដល់តំបន់ហ្កាហ្សាទេ ដូច្នេះពុំបានបំពានច្បាប់របស់សហរដ្ឋអាមេរិក ទោះបីទីក្រុងវ៉ាស៊ីនតោន បានទទួលស្គាល់ថា ស្ថានភាពមនុស្សធម៌នៅតែធ្ងន់ធ្ងរក្នុងតំបន់ហ៊ុមព័ទ្ធប៉ាឡេស្ទីន។