អនុប្រធានាធិបតី និងជារដ្ឋមន្ត្រីប្រេង របស់ប្រទេសវ៉េណេស៊ុយអេឡា លោកស្រី Delcy Rodriguez បាននិយាយកាលពីថ្ងៃចន្ទថា មនុស្ស១១នាក់ត្រូវបានចាប់ខ្លួន ជាផ្នែកមួយនៃការស៊ើបអង្កេតជុំវិញការផ្ទុះ និងបង្កអគ្គិភ័យនៅទីតាំងស្តុកឧស្ម័នដ៏ធំមួយកន្លែង។

ទីតាំងស្តុកឧស្ម័ន Muscar នៅតំបន់ Monagas ភាគខាងកើតប្រទេស ដំណើរការដោយក្រុមហ៊ុនប្រេងរដ្ឋ PDVSA ត្រូវបានបិទជាបណ្តោះអាសន្នបន្ទាប់ពីការផ្ទុះបំពង់បង្ហូរប្រេង បណ្តាលឱ្យមានអគ្គិភ័យ និងបណ្តាលឲ្យកម្មករយ៉ាងហោចណាស់៥នាក់រងរបួស ព្រមទាំងបង្ខំឱ្យមានការបែងចែកថាមពល នៅកន្លែងមួយចំនួន។

លោកស្រី Rodriguez និយាយថា ជនបរទេសម្នាក់ ដែលជាប់ពាក់ព័ន្ធនឹងករណីនេះ បានភៀសខ្លួនចេញពីប្រទេស ហើយក្រុមហ៊ុនប្រេងរដ្ឋ PDVSA បានទទួលរងនូវការខាតបង់ចំនួន១៥៧លានដុល្លារ ទោះបីជា វានៅមិនច្បាស់ថាតើតួលេខនេះទាក់ទងទៅនឹងឧប្បត្តិហេតុតែនៅទីតាំងស្តុកឧស្ម័ន Muscar ឬនៅទីតាំងផ្សេងទៀត។ ទីតាំងស្តុកឧស្ម័នMuscar ចែកចាយឧស្ម័នសម្រាប់ការដាក់បំពេញទៅក្នុងអាងប្រេង និងការផ្គត់ផ្គង់ក្នុងស្រុក។

រដ្ឋាភិបាលប្រទេសវេណេស៊ុយអេឡា ដែលប្រធានាធិបតី លោក Nicolas Maduro ត្រូវបានគេរំពឹងថានឹងចាប់ផ្តើមអាណត្តិទីបីនៅឆ្នាំក្រោយ បន្ទាប់ពីជម្លោះដ៏ខ្លាំងក្លាជាមួយក្រុមប្រឆាំង ជុំវិញភាគីណាមួយជាអ្នកឈ្នះការបោះឆ្នោតប្រធានាធិបតីកាលពីខែកក្កដា បាននិយាយដដែលៗថា ការបំផ្លិចបំផ្លាញ និងអំពើភេរវកម្ម គឺនៅពីក្រោយឧបទ្ទវហេតុនៅរោងចក្រប្រេង និងថាមពលអគ្គិសនី រួមទាំងការដាច់ចរន្តអគ្គិសនីនៅទូទាំងប្រទេស កាលពីខែសីហា។