កិច្ចប្រជុំកំពូលនៃក្រុមប្រទេសសេដ្ឋកិច្ចឈានមុខចំនួន ២០ ឬហៅថា G20 នៅទីក្រុង Rio de Janeiro ប្រទេសប្រេស៊ីល បានបង្កើតសេចក្តីថ្លែងការណ៍រួមមួយកាលពីថ្ងៃចន្ទដើមសប្ដាហ៍នេះថា ខណៈមិនត្រូវបានគាំទ្រទាំងស្រុងដោយសមាជិកក្រុមណាមួយនោះ សេចក្ដីថ្លែងការណ៍នេះ បានទទួលជោគជ័យក្នុងការនិយាយប្រធានបទភាគច្រើនដែលម្ចាស់ផ្ទះប្រេស៊ីលបានផ្តល់អាទិភាពដល់ការដោះស្រាយបញ្ហានានាដូចជា សង្រ្គាមដ៏ធំដែលនៅតែបន្ត កិច្ចព្រមព្រៀងពិភពលោកដើម្បីប្រយុទ្ធប្រឆាំងនឹងភាពអត់ឃ្លាន ការយកពន្ធរបស់ប្រជាជនដែលមានជាងគេលើពិភពលោក និងការផ្លាស់ប្តូរអភិបាលកិច្ចសកល។

ក្រុមអ្នកជំនាញមានមន្ទិលថាលោកប្រធានាធិបតីប្រេស៊ីល Luiz Inácio Lula da Silva អាចបញ្ចុះបញ្ចូលបណ្ដាមេដឹកនាំដែលបានជួបជុំគ្នាដើម្បីសង្កត់ធ្ងន់លើកិច្ចព្រមព្រៀងដែលផ្តល់ភាពមិនច្បាស់លាស់អំពីរដ្ឋបាលដែលនឹងចូលកាន់តំណែងរបស់ប្រធានាធិបតីជាប់ឆ្នោតអាមេរិក លោកDonald Trump និងការកើនឡើងភាពតានតឹងជាសកលស្របពេលមានសង្រ្គាមនៅអ៊ុយក្រែន និងមជ្ឈិមបូព៌ា។

ការវាយប្រហារលើអ៊ីស្រាអែលពីសំណាក់ក្រុមសកម្មប្រយុទ្ធហាម៉ាស កាលពីថ្ងៃទី ៧ ខែតុលា ឆ្នាំ ២០២៣ បានកើតឡើងមួយខែបន្ទាប់ពីកិច្ចប្រជុំកំពូល G20 នៅឥណ្ឌាកាលពីឆ្នាំមុន។ ដូច្នេះគេមិនច្បាស់ទេថា សេចក្តីថ្លែងការណ៍នៅឆ្នាំនេះ អាចដោះស្រាយយុទ្ធនាការសងសឹករបស់អ៊ីស្រាអែល ដែលបានសម្លាប់ជនជាតិប៉ាឡេស្ទីនជាង ៤៣.០០០នាក់ នៅដែនដីហ្កាហ្សា និងជាង៣.៥០០នាក់ នៅក្នុងប្រទេសលីបង់ ក្នុងការវាយលុករបស់អ៊ីស្រាអែលប្រឆាំងនឹងក្រុមហេសបូឡា បានឬអត់នោះទេ។

សេចក្តីថ្លែងការណ៍រួមរបស់ក្រុមប្រទេសG20 នៅឆ្នាំនេះ បានសំដៅទៅលើស្ថានភាពមនុស្សធម៌ដ៏មហន្តរាយនៅតំបន់ហ្កាហ្សា និងការកើនឡើងជម្លោះនៅលីបង់ ហើយបានសង្កត់ធ្ងន់លើភាពចាំបាច់បន្ទាន់ដើម្បីពង្រីកជំនួយមនុស្សធម៌ និងការពារជីវិតជនស៊ីវិល៕