រយៈពេល ១.០០០ថ្ងៃចាប់តាំងពីការចាប់ផ្តើមនៃការវាយលុករបស់រុស្ស៊ី សម្ព័ន្ធមិត្តអ៊ុយក្រែន កំពុងជំរុញលោកប្រធានាធិបតី Volodymyr Zelensky ឱ្យពិចារណារកវិធីថ្មីដើម្បីអូសទាញប្រធានាធិបតីរុស្ស៊ីលោក Vladimir Putin ឱ្យមកតុចរចា ខណៈពួកគេប្រឹងប្រែងបញ្ចប់ការប្រយុទ្ធ។

ប្រធានាធិបតីជាប់ឆ្នោតអាមេរិក លោក Donald Trump នឹងត្រលប់ទៅសេតវិមានវិញក្នុងខែមករា ដោយសន្យាថានឹងបញ្ចប់សង្រ្គាមយ៉ាងឆាប់រហ័ស។ អធិការបតីអាល្លឺម៉ង់ លោក Olaf Scholz ក្នុងអំឡុងពេលសន្ទនាតាមទូរសព្ទកាលពីថ្ងៃទី១៥ វិច្ឆិកា បានជំរុញឱ្យលោក Putin ចូលរួមក្នុងការចរចាសន្តិភាព។

ប្រធានាធិបតីបារាំង លោក Emmanuel Macron បានលើកឡើងកាលពីថ្ងៃទី១៧ វិច្ឆិកាថា លោកនឹងនិយាយទៅកាន់មេដឹកនាំរុស្ស៊ី នៅពេលវេលាស័ក្ដិសម។ មន្ត្រីអឺរ៉ុបពីររូបនិយាយថា មានការទទួលស្គាល់កាន់តែខ្លាំងឡើងថា លោក Zelensky នឹងត្រូវសម្របសម្រួលជាមួយលោក Putin ព្រោះច្បាស់ណាស់ថា ភាគីទាំងពីរមិនអាចទទួលបានជ័យជម្នះដាច់ខាតទេ។

ប្រធានាធិបតីទួរគី លោក Tayyip Erdogan គឺជាសមាជិកណាតូ ចុងក្រោយបង្អស់ដែលបានចូលរួមក្នុងកិច្ចប្រឹងប្រែងនេះជាមួយនឹងសំណើរបស់ខ្លួនដើម្បីបង្កកជម្លោះនៅលើជួរមុខបច្ចុប្បន្ន។ សកម្មភាពភ្លាមៗសម្រាប់ការដោះស្រាយនេះ បង្ហាញពីភាពបន្ទាន់ជាថ្មីពីសម្ព័ន្ធមិត្តអ៊ុយក្រែន ដែលកំពុងព្យាយាមដើរមុនមួយជំហាន មុនពេលការវិលត្រឡប់របស់លោក Trump និងលទ្ធភាពនៃការកាត់បន្ថយការគាំទ្ររបស់អាមេរិក៕