ទីភ្នាក់ងារសារព័ត៌មាននៃសាធារណរដ្ឋស្លូវ៉ាគី (TASR) បានរាយការណ៍ថា នាយករដ្ឋមន្ត្រីស្លូវ៉ាគីលោក Robert Fico កាលពីថ្ងៃចន្ទ បានសម្តែងការប្រឆាំងចំពោះការប្រើប្រាស់មីស៊ីលរយៈចម្ងាយឆ្ងាយរបស់សហរដ្ឋអាមេរិកដោយអ៊ុយក្រែន ដើម្បីវាយប្រហារ នៅក្នុងប្រទេសរុស្ស៊ី។

ប្រព័ន្ធផ្សព្វផ្សាយអាមេរិក បានរាយការណ៍កាលពីថ្ងៃអាទិត្យថា នៅក្នុងការផ្លាស់ប្តូរដ៏សំខាន់នៃគោលនយោបាយរបស់រដ្ឋបាលរបស់លោកស្តីពីវិបត្តិអ៊ុយក្រែន ប្រធានាធិបតីសហរដ្ឋអាមេរិកលោក ចូ បៃដិន (Joe Biden) បានអនុញ្ញាតឲ្យទីក្រុងគីវ ប្រើប្រាស់មីស៊ីលរយៈចម្ងាយឆ្ងាយដែលផ្គត់ផ្គង់ដោយសហ   រដ្ឋអាមេរិក ដើម្បីវាយប្រហារគោលដៅ នៅក្នុងដឹកដីរុស្ស៊ី។

ប្រព័ន្ធផ្សព្វផ្សាយរបស់សហរដ្ឋអាមេរិករួមមាន AP, The New York Times និង The Washington Post បានរយការណ៍ដោយដកស្រង់សម្តីមន្ត្រីអាមេរិកអនាមិកពីរនាក់ថា ភ្លើងខៀវ នឹងអនុញ្ញាតឲ្យអ៊ុយក្រែន ប្រើប្រាស់មីស៊ីលតាក់ទិចកងទ័ព (ATACMS)ផលិតដោយលោកខាងលិច ជាលើកដំបូង។  

TASR បានរាយការណ៍ថា លោក Fico បានណែនាំរដ្ឋមន្ត្រីការបរទេសរបស់ប្រទេសនេះគឺ លោក Juraj Blanar និងរដ្ឋមន្ត្រីការពារជាតិ លោក Robert Kalinak មិនឲ្យគាំទ្រការសម្រេចចិត្តនេះទេ។

ការិយាល័យរដ្ឋាភិបាល បានដកស្រង់សម្តីរបស់ Fico ដែលបាននិយាយថា៖«នេះ គឺជាការកើនឡើងនៃភាពតានតឹងដែលមិនធ្លាប់មានពីមុនមក»។ នេះបើយោងតាមរបាយការណ៍។