ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិ(UN)អ្នកស្រី Linda Thomas-Greenfield បាននិយាយថា សហរដ្ឋអាមេរិក នឹងប្រកាសជំនួយសន្តិសុខបន្ថែមទៀតសម្រាប់អ៊ុយក្រែន នៅរយៈពេលប៉ុន្មានថ្ងៃខាងមុខនេះ ស្របពេលការវាយលុករបស់រុស្ស៊ីលើអ៊ុយក្រែនឈានដល់រយៈពេល ១ពាន់ថ្ងៃ ។

អ្នកស្រី Thomas-Greenfield បាននិយាយថា ការគាំទ្រអ៊ុយក្រែននៅក្នុងសភាអាមេរិក មិនគួរជាបញ្ហាបក្សពួកនោះទេ ហើយការក្រោកឈរ ដើម្បីលទ្ធិប្រជាធិបតេយ្យ និងសិទ្ធិមនុស្ស គឺលើសពីបញ្ហានយោបាយទៅទៀត ។

នៅថ្ងៃអង្គារនេះ អ៊ុយក្រែន បានប្រារព្ធរយៈពេល ១ពាន់ថ្ងៃ ចាប់តាំងពីរុស្ស៊ីបើកការវាយប្រហារពេញលេញ ពេលដែលទាហានធ្វើសង្រ្គាមនៅតាមខ្សែត្រៀមមុខជាច្រើន ទីក្រុងគីវ រងការវាយប្រហារជាញឹកញាប់ដោយយានដ្រូន និងមីស៊ីល ហើយក្រុមមន្រ្តីអ៊ុយក្រែន ត្រៀមខ្លួនសម្រាប់ពេលដែលលោក Donald Trump វិលត្រឡប់មកកាន់សេតវិមានវិញនៅខែមករា ខាងមុខ ។

ជាការរួបរួមជាមួយប្រទេសរងគ្រោះមួយនេះ កាលពីថ្ងៃអាទិត្យ ប្រធានាធិបតីសហរដ្ឋអាមេរិកលោក Joe Biden បានបើកភ្លើងខៀវឲ្យអ៊ុយក្រែនប្រើប្រាស់មីស៊ីលសហរដ្ឋអាមេរិក វាយប្រហារចូលកាន់តែជ្រៅទៅក្នុងទឹកដីរុស្ស៊ី ៕