អ្នកស្រុកនៅក្នុងរដ្ឋភាគខាងជើងនៃប្រទេសឥណ្ឌាបានមើលឃើញថ្ងៃមួយទៀតនៃគុណភាពខ្យល់មិនល្អកាលពីថ្ងៃអង្គារទី១៩វិច្ឆិកាសប្ដាហ៍នេះ ខណៈស្រទាប់អ័ព្ទក្រាស់បានគ្របដណ្តប់តំបន់ភាគច្រើន ហើយការបំពុលនៅក្នុងរដ្ឋធានីដេលី នៅតែធ្ងន់ធ្ងរ។

ប្រទេសឥណ្ឌាប្រយុទ្ធប្រឆាំងនឹងការបំពុលខ្យល់រៀងរាល់រដូវរងា នៅពេលអាកាសធាតុត្រជាក់ ខ្យល់ផ្ទុកដោយធូលី ការបញ្ចេញឧស្ម័ន និងផ្សែងពីការដុតបំពួកភ្លើងនៅតាមកសិដ្ឋាននានា បានចាប់ផ្តើមដោយខុសច្បាប់នៅក្នុងរដ្ឋកសិកម្មនៃរដ្ឋ Punjab និងរដ្ឋ Haryana ។

សន្ទស្សន៍គុណភាពខ្យល់ (AQI) បានឈានដល់កម្រិតខ្ពស់បំផុត ៤៩១ នៅក្នុងរដ្ឋធានីដេលីកាលពីថ្ងៃចន្ទដើមសប្ដាហ៍នេះ ដោយបង្ខំឱ្យរដ្ឋាភិបាលរឹតត្បិតលើចលនាយានយន្ត សកម្មភាពសំណង់ និងជំរុញឱ្យបិទសាលារៀន ដោយបង្រៀនតាមonline។

ផ្ទុយទៅវិញ គុណភាពខ្យល់បានប្រសើរឡើងនៅក្នុងខេត្ត Punjab នៃប្រទេសប៉ាគីស្ថានជិតខាង ដែលជំរុញឱ្យក្រុមអាជ្ញាធរនៅក្នុងទីក្រុង Lahore និង Multan រងផលប៉ះពាល់ខ្លាំងបំផុត ឱ្យបើកសាលារៀនឡើងវិញចាប់ពីថ្ងៃពុធសប្ដាហ៍នេះ បន្ទាប់ពីបិទអស់រយៈពេលជាងមួយសប្តាហ៍ ដោយសារកម្រិតបំពុលដ៏គ្រោះថ្នាក់។

បទបញ្ជារបស់រដ្ឋាភិបាលបាននិយាយកាលពីថ្ងៃអង្គារថា សិស្សនឹងត្រូវពាក់ម៉ាស ហើយនឹងមានការហាមប្រាមទាំងស្រុងលើសកម្មភាពកីឡានៅខាងក្រៅ។

សន្ទស្សន៍គុណភាពខ្យល់ (AQI) របស់ទីក្រុង Lahore បានធ្លាក់ចុះមកនៅត្រឹម ១៥៨ កាលពីល្ងាចថ្ងៃអង្គារសប្ដាហ៍នេះ ដែលស្ថាប័នតាមដានគុណភាពខ្យល់ស៊ុយអែត AQair ចាត់ថ្នាក់ថាស្ថិតក្នុងស្ថានភាពមិនល្អ បន្ទាប់ពីគ្របដណ្ដប់លើទីតាំងមួយចំនួនកាលពីសប្តាហ៍មុន៕