សេតវិមានបានរិះគន់ «វោហាសាស្ត្រមិនទទួលខុសត្រូវ» របស់រុស្ស៊ីកាលពីថ្ងៃអង្គារ បន្ទាប់ពីលោក វ្ល៉ាឌីមៀ ពូទីន បានបន្ធូរបន្ថយវិធានការរបស់ទីក្រុងមូស្គូសម្រាប់ការវាយប្រហារនុយក្លេអ៊ែរ ប៉ុន្តែបាននិយាយថា ខ្លួនមើលឃើញថាពុំចាំបាច់ផ្លាស់ប្តូរគោលជំហរកម្លាំងផ្ទាល់ខ្លួននោះទេ។

ចំណាត់ការរបស់លោក ពូទីន បានធ្វើឡើងបន្ទាប់ពីទីក្រុងវ៉ាស៊ីនតោន បានអនុញ្ញាតឱ្យប្រទេសអ៊ុយក្រែន បាញ់មីស៊ីលរយៈចម្ងាយឆ្ងាយផលិតដោយសហរដ្ឋអាមេរិក ចូលទៅក្នុងទឹកដីរបស់រុស្ស៊ី ដោយទីក្រុងមូស្គូ និយាយថា ទីក្រុងគីវ បានប្រើប្រាស់សព្វាអាវុធបែបនេះជាលើកដំបូង កាលពីថ្ងៃអង្គារ។

អ្នកនាំពាក្យក្រុមប្រឹក្សាសន្តិសុខជាតិសហរដ្ឋអាមេរិក បានប្រាប់សារព័ត៌មាន AFP ថា «នេះគឺជាវោហាសាស្ត្រដែលមិនទទួលខុសត្រូវពីប្រទេសរុស្ស៊ី។

អ្នកនាំពាក្យបាននិយាយថា «យើងពុំមានការភ្ញាក់ផ្អើលចំពោះការប្រកាសរបស់រុស្ស៊ីដែលថា ខ្លួននឹងធ្វើបច្ចុប្បន្នភាពគោលលទ្ធិនុយក្លេអ៊ែររបស់ខ្លួន» ហើយទីក្រុងមូស្គូ បាន បង្ហាញចេតនារបស់ខ្លួន ដើម្បីធ្វើដូច្នេះ រយៈពេលជាច្រើនសប្តាហ៍មកហើយ។

ដោយសង្កេតឃើញថា ពុំមានការផ្លាស់ប្តូរចំពោះជំហរនុយក្លេអ៊ែររបស់រុស្ស៊ី នោះយើងក៏ពុំបានមើលឃើញហេតុផលណាមួយដើម្បីកែប្រែជំហរ ឬគោលលទ្ធិនុយក្លេអ៊ែរផ្ទាល់ខ្លួនរបស់យើងដែរ ក្នុងការឆ្លើយតបទៅនឹងសេចក្តីថ្លែងការណ៍របស់រុស្ស៊ី នៅថ្ងៃនេះ។

មន្ត្រីអាមេរិក បានបញ្ជាក់កាលពីពេលមុនថា ប្រធានាធិបតីជិតផុតអាណត្តិ លោក Joe Biden ដែលបានចូលរួមក្នុងកិច្ចប្រជុំកំពូល G20 នៅទីក្រុង Rio de Janeiro បានផ្តល់ភ្លើងខៀវឱ្យសម្ព័ន្ធមិត្តទីក្រុង គីវ ប្រើប្រាស់មីស៊ីលរយៈចម្ងាយឆ្ងាយ ប្រឆាំងរុស្ស៊ី។