លោកប្រធានាធិបតី Volodymyr Zelenskiy បានប្រាប់សភាអ៊ុយក្រែន កាលពីថ្ងៃអង្គារ (១៩ វិច្ឆិកា) ថា សង្រ្គាមបានឈានដល់ដំណាក់កាលសំខាន់បំផុតមួយ ខណៈលោកបានជំរុញឱ្យពលរដ្ឋរក្សាភាពអត់ធន់ និងបានលើកឡើងពីផែនការបង្កើនការផលិតអាវុធវាយប្រហារ។

នៅក្នុងសុន្ទរកថារយៈពេលមួយម៉ោង ដើម្បីប្រារព្ធខួប ១.០០០ ថ្ងៃ ចាប់តាំងពីការវយលុកទ្រង់ទ្រាយធំរបស់រុស្ស៊ី លោកបាននិយាយថា អ៊ុយក្រែននឹងមិនដោះដូរអធិបតេយ្យភាពរបស់ខ្លួន ឬលះបង់សិទ្ធិទឹកដីរបស់ខ្លួនឡើយ ហើយលោកបានច្រានចោលការរៀបចំការបោះឆ្នោតថ្មី រហូតដល់សន្តិភាពត្រូវបានសម្រេច។

លោក Zelenskiy ក៏បានដាក់ចេញនូវអ្វីដែលលោកហៅថា "ផែនការភាពធន់" ដែលជាផែនការក្នុងស្រុក បន្ថែមពីលើ "ផែនការជ័យជម្នះ" ដែលលោកបានដាក់ជូនសម្ព័ន្ធមិត្តលោកខាងលិច ហើយបាននិយាយថា វាចាំបាច់ត្រូវបង្ខំឱ្យរុស្ស៊ីចរចាបញ្ចប់សង្គ្រាម។

ទោះបីជាលោកប្រាប់ថា សេចក្តីលម្អិតពេញលេញនៃផែនការនេះនឹងត្រូវបានលាតត្រដាងនៅចុងឆ្នាំក៏ដោយ ប៉ុន្តែវារួមបញ្ចូលជំហានបង្កើតស្ថិរភាពជួរមុខ គាំទ្រការច្នៃប្រឌិតយោធា និងការផលិតអាវុធ ក៏ដូចជាវិធានការដើម្បីពង្រឹងឯកភាពជាតិ និងអត្តសញ្ញាណវប្បធម៌៕