ប្រមុខការពារជាតិអាស៊ីអាគ្នេយ៍ និងអ្នកតំណាងបានជួបប្រជុំគ្នាក្នុងប្រទេសឡាវ នៅថ្ងៃពុធ (២០ វិច្ឆិកា) នេះសម្រាប់កិច្ចពិភាក្សាផ្នែកសន្តិសុខ ក្នុងពេលជម្លោះដែនសមុទ្រកើនឡើងជាមួយចិន នៅក្នុងតំបន់អាស៊ីប៉ាស៊ីហ្វិក និងខណៈដែលការផ្លាស់ប្តូរប្រធានាធិបតីអាមេរិកថ្មីកំពុងលេចចេញជារូបរាង។

រដ្ឋមន្ត្រីការពារជាតិអាមេរិក លោក Lloyd Austin គ្រោងនឹងចូលរួមកិច្ចប្រជុំរបស់រដ្ឋមន្ត្រីការពារជាតិនៃសមាគមប្រជាជាតិអាស៊ីអាគ្នេយ៍ (អាស៊ាន) នេះនៅទីក្រុងវៀងចន្ទន៍ ដែលមនុស្សជាច្រើននឹងកំពុងស្វែងរកការធានា មុនពេលប្រធានាធិបតីជាប់ឆ្នោត លោក Donald Trump ត្រលប់ចូលកាន់អំណាចនៅក្នុងខែមករា។

ក្រៅពីសហរដ្ឋអាមេរិក ប្រទេសផ្សេងទៀតដែលចូលរួមកិច្ចប្រជុំអាស៊ានរយៈពេលពីរថ្ងៃនេះរួមមាន ជប៉ុន កូរ៉េខាងត្បូង ឥណ្ឌា អូស្ត្រាលី និងចិន។ រួមជាមួយហ្វីលីពីន ប្រទេសសមាជិកអាស៊ានដូចជាវៀតណាម ម៉ាឡេស៊ី និងប្រ៊ុយណេ មានជម្លោះអះអាងសិទ្ធជាមួយចិន ក្នុងសមុទ្រចិនខាងត្បូង ដែលទីក្រុងប៉េកាំង ទាមទារស្ទើរតែទាំងស្រុងថាជាទឹកដីរបស់ខ្លួន។

ដោយសារចិន បានជំរុញការអះអាងររបស់ខ្លួនយ៉ាងស្វាហាប់ក្នុងប៉ុន្មានឆ្នាំថ្មីៗនេះ សមាជិកអាស៊ាន និងទីក្រុងប៉េកាំង បាននឹងកំពុងចរចាអំពីក្រមប្រតិបត្តិដើម្បីគ្រប់គ្រងឥរិយាបទនៅក្នុងដែនសមុទ្រ ប៉ុន្តែវឌ្ឍនភាពមានភាពយឺតយ៉ាវ៕