នៅថ្ងៃពុធនេះ ប្រជាពលរដ្ឋរស់នៅក្នុងរដ្ឋធានីបេរូត ប្រទេសលីបង់ បានបង្ហាញមន្ទិលសង្ស័យរបស់ខ្លួន រយៈពេល ១ថ្ងៃ ក្រោយអ្នកសម្របសម្រួលជាន់ខ្ពស់សហរដ្ឋអាមេរិក បំពេញទស្សនកិច្ចទៅកាន់ប្រទេសលីបង់ សម្រាប់កិច្ចប្រជុំស្វែងរកបទឈប់បាញ់ ហើយលោកបាននិយាយថា មាននូវឱកាសពិតប្រាកដមួយ ដើម្បីបញ្ចប់ជម្លោះរវាងអ៊ីស្រាអែល និងក្រុមហេសបូឡា ។

ប្រេសិតពិសេសសេតវិមានលោក Amos Hochstein មាននូវជំនួបជាមួយប្រធានសភាលីបង់លោក Nabih Berri កាលពីថ្ងៃអង្គារ រយៈពេល ១ថ្ងៃប៉ុណ្ណោះ ក្រោយរដ្ឋាភិបាលលីបង់ និងក្រុមហេសបូឡាគាំទ្រដោយអ៊ីរ៉ង់ យល់ព្រមលើសំណើបទឈប់បាញ់របស់សហរដ្ឋអាមេរិក បើទោះបីជាមានសេចក្តីអត្ថាធិប្បាយមួយចំនួនលើខ្លឹមសារក៏ដោយ ។

នៅភាគកណ្តាលទីក្រុងបេរូត លោក Kamal el-Koush គឺជាពលរដ្ឋមួយរូបរបស់លីបង់ បាននិយាយថា លោកមានសុទិដ្ឋិនិយម ក្រោយសេចក្តីអត្ថាធិប្បាយរបស់លោក Berri លើកិច្ចពិភាក្សា ប៉ុន្តែបាល់ឥឡូវនៅជាមួយអាមេរិក ហើយនិងអ៊ីស្រាអែល ហើយវាអាស្រ័យលើគោលបំណងរបស់ទីក្រុងវ៉ាស៊ីងតោនលើប្រទេសលីបង់ ។

លោក Ahmad Shaib គឺជាពលរដ្ឋមួយរូបទៀតរស់នៅក្នុងទីក្រុងបេរូត និយាយថា លោកយល់ឃើញថា លីបង់ចង់បានដំណោះស្រាយ ប៉ុន្តែលោកគិតថា វាមិនទំនងជាកិច្ចចរចានឹងទទួលបានបទឈប់បាញ់ភ្លាមៗនោះទេ ។

អ៊ីស្រាអែល បានចាប់ផ្តើមបើកការវាយប្រហាររបស់ខ្លួន ក្រោយជម្លោះឆ្លងកាត់ព្រំដែនអស់រយៈពេលជិត ១ឆ្នាំជាមួយក្រុមហេសបូឡា ។

ក្រុមអាជ្ញាធរលីបង់ និយាយថា យុទ្ធនាការរបស់អ៊ីស្រាអែល បានសម្លាប់មនុស្ស ៣.៥៤៤នាក់ នៅលីបង់ ចាប់តាំងពីជម្លោះចាប់ផ្តើម ។

ដោយឡែក យោងតាមតួលេខរបស់អ៊ីស្រាអែល បានឲ្យដឹងថា ការវាយប្រហាររបស់ក្រុមហេសបូឡា បានសម្លាប់ជនស៊ីវិល ៤៣នាក់នៅតំបន់ភាគខាងជើងអ៊ីស្រាអែល និងតំបន់ខ្ពង់រាប Golan Heights កាន់កាប់ដោយអ៊ីស្រាអែល ខណៈទាហាន ៧៣នាក់ ត្រូវបានសម្លាប់ក្នុងការវាយប្រហារនៅតំបន់ភាគខាងជើងអ៊ីស្រាអែល និងតំបន់ខ្ពង់រាប Golan Heights ហើយនិងសង្រ្គាមនៅតំបន់ភាគខាងត្បូងលីបង់ ៕