រដ្ឋបាលយោធាទីក្រុងគីវ និយាយថា អង្គភាពការពារដែនអាកាសអ៊ុយក្រែន បានព្យាយាមរុញច្រានការវាយប្រហារតាមច្រកអាកាសរបស់រុស្ស៊ីលើទីក្រុងគីវ នៅព្រឹកថ្ងៃពុធនេះ ។

ក្រុមសាក្សីទីភ្នាក់ងារព័ត៌មានរ៉យទ័រ បានឮសំឡេងផ្ទុះគ្រាប់ជាច្រើន ដូចជាសំឡេងពេលចុះប្រតិបត្តិការសឹករបស់អង្គភាពការពារដែនអាកាស ។ គ្មានគ្រោះថ្នាក់ និងការខូចខាត ត្រូវបានរាយការណ៍នោះទេ ។

នៅថ្ងៃពុធនេះដែរ សហរដ្ឋអាមេរិក បានបិទស្ថានទូតរបស់ខ្លួននៅក្នុងទីក្រុងគីវ ដោយសារមានព័ត៌មានច្បាស់ការណ៍ពីការវាយប្រហារតាមច្រកអកាសដុំកំភួន ហើយនិងបាននិយាយប្រាប់ពលរដ្ឋរបស់ខ្លួននៅក្នុងប្រទេសអ៊ុយក្រែន ត្រូវតែត្រៀមខ្លួនស្វែងរកទីជម្រកភ្លាមៗ ។

ការព្រមានខុសប្រក្រតីនេះ បានកើតមានឡើង រយៈពេល ១ថ្ងៃ ក្រោយអ៊ុយក្រែន ប្រើប្រាស់មីស៊ីល ATACMS របស់អាមេរិក ដើម្បីវាយប្រហារលើគោលដៅក្នុងដែនដីរុស្ស៊ី យកប្រៀបពីការអនុញ្ញាតផ្តល់ជូនថ្មីពីរដ្ឋបាលជិតផុតអាណត្តិរបស់លោកប្រធានាធិបតីសហរដ្ឋអាមេរិក Joe Biden នៅថ្ងៃទី ១ពាន់នៃសង្រ្គាមរបស់រុស្ស៊ី ។

គួរឲ្យដឹងថា រុស្ស៊ី បានព្រមានលោកខាងលិចជាច្រើនខែមកហើយថា ប្រសិនបើទីក្រុងវ៉ាស៊ីងតោន អនុញ្ញាតឲ្យអ៊ុយក្រែន បាញ់មីស៊ីលរបស់អាមេរិក អង់គ្លេស និងបារាំង ចូលជ្រៅទៅក្នុងទឹកដីប្រទេសរុស្ស៊ី នោះទីក្រុងម៉ូស្គូ នឹងចាត់ទុកសមាជិកសម្ព័ន្ធយោធាណាតូទាំងនោះថា បានពាក់ព័ន្ធដោយផ្ទាល់នៅក្នុងសង្គ្រាមនៅអ៊ុយក្រែន ៕