ព្យុះដ៏ខ្លាំងក្លាមួយបានបោកបក់ទៅលើរដ្ឋ វ៉ាស៊ីនតោន របស់សហរដ្ឋអាមេរិក កាលពីថ្ងៃពុធ (២០ វិច្ឆិកា) បង្កផលប៉ះពាល់យ៉ាងទូលំទូលាយ ដោយកាត់ផ្តាច់ចរន្តអគ្គិសនីដល់មនុស្សជាងកន្លះលាននាក់ ខណៈរំខានដល់ការធ្វើដំណើរតាមដងផ្លូវ និងបណ្តាលឱ្យមនុស្សយ៉ាងហោចណាស់ ២នាក់ស្លាប់ និង ២នាក់រងរបួស។

យោងតាមក្រុមអ្នកព្យាករបានឱ្យដឹងថា កម្លាំងខ្យល់អាចធ្លាក់ចុះពាសពេញតំបន់នៅពាក់កណ្តាលថ្ងៃ ប៉ុន្តែព្យុះដ៏កាចសាហាវនេះបានឆ្ពោះទៅកាន់រដ្ឋកាលីហ្វ័រនីញ៉ា (California) ហើយរំពឹងថានឹងនាំមកនូវភ្លៀងធ្លាក់ខ្លាំងនៅចុងសប្តាហ៍នេះ។

ព្យុះដែលមានកម្លាំងខ្យល់ព្យុះត្រូពិចក្នុងល្បឿន ៨០គីឡូម៉ែត្រក្នុងមួយម៉ោង និងខ្យល់កន្រ្តាក់ប្រហែល ១១០គីឡូម៉ែត្រក្នុងមួយម៉ោងនេះ បានបំផ្លាញដើមឈើ និងបណ្ដាញខ្សែភ្លើងជាច្រើន។ លំនៅឋាន និងអាជីវកម្មជាង ៥៣០.០០០ទីតាំង នៅរដ្ឋវ៉ាស៊ីនតោន ភាគនិរតីរដ្ឋ អូហ្គិន (Oregon) និងភាគខាងជើងរដ្ឋកាលីហ្វ័រនីញ៉ា គឺពុំមានថាមពលឡើយ នេះបើយោងតាមគេហទំព័រតាមដានការដាច់ចរន្ត Poweroutage.us ដោយធ្លាក់ចុះពីតួលេខជាង ៦០០.០០០ទីតាំង នៅមុននោះ។

សាលារៀននៅទូទាំងភាគខាងលិចរដ្ឋវ៉ាស៊ីនតោន បានលុបចោល ឬពន្យារពេលការចាប់ផ្ដើមថ្នាក់ថ្មីនៅថ្ងៃបន្ទាប់ ហើយអ្នកជំនាញឧតុនិយមនៃសេវាអាកាសធាតុជាតិ បាននិយាយថា ព្យុះនេះត្រូវបានគេហៅថា "ព្យុះស៊ីក្លូនគ្រាប់បែក" ដោយសារវាកើនឡើងកម្លាំងកាន់តែខ្លាំងក្លាយ៉ាងឆាប់រហ័ស ហើយនឹងបញ្ឈប់នៅភាគខាងជើងរដ្ឋកាលីហ្វ័រនីញ៉ា ក្នុងប៉ុន្មានថ្ងៃខាងមុខនេះ៕