ព្រឹទ្ធសភារបស់សហរដ្ឋអាមេរិក កាលពីថ្ងៃពុធ (២០ វិច្ឆិកា) បានរារាំងសំណើច្បាប់មួយដែលអាចនឹងបញ្ឈប់ការលក់សព្វាវុធរបស់អាមេរិកមួយចំនួនទៅឱ្យអ៊ីស្រាអែល ដែលត្រូវដាក់ចេញជុំវិញក្ដីបារម្ភអំពីមហន្តរាយសិទ្ធិមនុស្សដែលជនជាតិប៉ាឡេស្ទីនកំពុងប្រឈមនៅក្នុងតំបន់សង្រ្គាម ហ្កាហ្សា។

ព្រឹទ្ធសមាជិក ៧៩រូបក្នុងចំណោម ១០០រូប បានជំទាស់នឹងសេចក្ដីសម្រេចដែលនឹងរារាំងការលក់រថក្រោះទៅឱ្យអ៊ីស្រាអែល ខណៈ ១៨រូបបានអនុម័ត។ ព្រឹទ្ធសមាជិក ៧៨រូបបានប្រឆាំងនឹងសំណើទីពីរ ដែលចង់បញ្ឈប់ការដឹកជញ្ជូនគ្រាប់កាំភ្លើងត្បាល់ ខណៈ ១៩រូបបានគាំទ្រ។

ព្រឹទ្ធសភាក៏នឹងបោះឆ្នោតលើសំណើទីបី ដែលចង់បញ្ឈប់ការដឹកជញ្ជូនប្រព័ន្ធ GPS កំណត់គោលដៅសម្រាប់គ្រាប់បែកឱ្យអ៊ីស្រាអែល ផងដែរ។ សូមបញ្ជាក់ថា "សេចក្ដីសម្រេចនៃការមិនយល់ព្រម" ទាំងនេះត្រូវបានដាក់ដោយព្រឹទ្ធសមាជិក Bernie Sanders ដែលជាអ្នកនយោបាយឯករាជ្យ។

ការគាំទ្រទ្វេបក្សដ៏រឹងមាំសម្រាប់អ៊ីស្រាអែលនៅក្នុងសភា មានន័យថា សេចក្ដីសម្រេចប្រឆាំងទាំងនោះទំនងជាមិនអាចឆ្លងព្រឹទ្ធសភាផុតឡើយ ប៉ុន្តែក្រុមអ្នកគាំទ្រសំណើសង្ឃឹមថា ការអនុម័តយ៉ាងសំខាន់នៅក្នុងព្រឹទ្ធសភា នឹងលើកទឹកចិត្តដល់រដ្ឋាភិបាលអ៊ីស្រាអែល និងរដ្ឋបាលរបស់លោកប្រធានាធិបតី Joe Biden ឱ្យប្រឹងប្រែងបន្ថែមទៀតដើម្បីការពារជនស៊ីវិលនៅតំបន់ហ្កាហ្សា៕