លោក ខាលីល អាល់-ហាយយ៉ា (Khalil al-Hayya) ប្រធានស្តីទីរបស់ក្រុមសកម្មប្រយុទ្ធហាម៉ាស នៅតំបន់ហ្កាហ្សា បាននិយាយនៅក្នុងសុន្ទរកថាដែលចាក់ផ្សាយកាលពីថ្ងៃពុធ (២០ វិច្ឆិកា) ថា ក្រុមរបស់ខ្លួនទទូចថានឹងមិនមានកិច្ចព្រមព្រៀងដោះដូរចំណាប់ថ្នូរ និងអ្នកទោស ជាមួយអ៊ីស្រាអែលទេ លុះត្រាតែសង្គ្រាមដ៏បង្ហូរឈាមនៅក្នុងតំបន់ហ៊ុមព័ទ្ធប៉ាឡេស្ទីននេះបានបញ្ចប់។

លោក Hayya បាននិយាយក្នុងបទសម្ភាសតាមទូរទស្សន៍ Al-Aqsa របស់ក្រុមនេះថា "ប្រសិនបើពុំមានការបញ្ចប់សង្រ្គាមទេ នោះក៏មិនអាចមានការផ្លាស់ប្តូរអ្នកទោសបានដែរ" ដោយបញ្ជាក់ឡើងវិញពីជំហររបស់ក្រុមហាម៉ាស ក្នុងការបញ្ចប់សង្រ្គាម។

កិច្ចខិតខំប្រឹងប្រែងចរចាបទឈប់បាញ់សម្រាប់តំបន់ហ្កាហ្សា បានជាប់គាំង ហើយការវេតូរបស់សហរដ្ឋអាមេរិក លើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលអំពាវនាវឱ្យមានបទឈប់បាញ់ជាអចិន្ត្រៃយ៍ដោយគ្មានលក្ខខណ្ឌនៅហ្កាហ្សា បានបន្ថែមភាពមិនច្បាស់លាស់លើក្ដីសង្ឃឹមបញ្ចប់សង្រ្គាម។

លោក Hayya ដែលបានដឹកនាំក្រុមចរចារក្នុងកិច្ចពិភាក្សាជាមួយប្រទេសកាតា និងអ្នកសម្រុះសម្រួលអេហ្ស៊ីប បានស្តីបន្ទោសភាពជាប់គាំងនេះទៅលើនាយករដ្ឋមន្ត្រីអ៊ីស្រាអែល លោក Benjamin Netanyahu ខណៈអ៊ីស្រាអែល ចោទទៅវិញថាក្រុមអ៊ិស្លាមនិយមមួយនេះជាអ្នកបង្អាក់កិច្ចចរចាសន្តិភាព៕