ទីភ្នាក់ងារសារព័ត៌មានរដ្ឋស៊ីរី SANA បានរាយការណ៍ថា ការវាយប្រហាររបស់អ៊ីស្រាអែលទៅលើទីក្រុងប្រវត្តិសាស្ត្រផាលមីរ៉ា (Palmyra) របស់ប្រទេសស៊ីរីបានសម្លាប់មនុស្ស ៣៦ នាក់ និង៥០នាក់របួសជាងកាលពីថ្ងៃពុធទី២០វិច្ឆិកាសប្ដាហ៍នេះ បន្ទាប់ពីបានវាយប្រហារទៅលើអគារលំនៅដ្ឋាន និងតំបន់ឧស្សាហកម្មមួយ។

យោធាអ៊ីស្រាអែល បានបដិសេធមិនធ្វើអត្ថាធិប្បាយទេ នៅពេលសួរពីការវាយប្រហារនោះ។សារព័ត៌មាន SANA បាននិយាយដោយដកស្រង់សម្តីមន្ត្រីយោធាថា នៅម៉ោងប្រហែល១កន្លះរសៀលថ្ងៃនេះ សត្រូវអ៊ីស្រាអែលបានបើកការវាយប្រហារតាមអាកាសពីទិសដៅនៃតំបន់al-Tanfដាក់គោលដៅលើអគារមួយចំនួននៅក្នុងទីក្រុងផាលមីរ៉ា ក្នុងតំបន់វាលខ្សាច់របស់ប្រទេសស៊ីរី ដែលឈានដល់ការសម្លាប់មនុស្សចំនួន ៣៦នាក់ និងបណ្ដាលឲ្យមនុស្ស៥០នាក់ផ្សេងទៀតរងរបួស។

ប្រភពដដែលបានបន្ថែមថា ការវាយប្រហារនេះ ក៏បានបង្កការខូចខាតយ៉ាងធ្ងន់ធ្ងរផងដែរ ដល់អគារដែលជាគោលដៅ និងតំបន់ជុំវិញ។

កាលពីថ្ងៃព្រហស្បតិ៍១៤វិច្ឆិកាថ្មីៗនេះ ការវាយប្រហារតាមអាកាសរបស់អ៊ីស្រាអែលលើអគារលំនៅឋានក្នុងរដ្ឋធានីដាម៉ាស់ ក៏បានឆក់យកជីវិតមនុស្ស១៥នាក់ផងដែរ។

អ៊ីស្រាអែលបាននិងកំពុងវាយប្រហារលើគោលដៅទាំងឡាយពាក់ព័ន្ធនឹងអ៊ីរ៉ង់ក្នុងប្រទេសស៊ីរីអស់រយៈពេលជាច្រើនឆ្នាំ ប៉ុន្តែបានបង្កើនការវាយឆ្មក់បែបនេះចាប់តាំងពីថ្ងៃទី ៧ ខែតុលា ឆ្នាំមុនមក ពោលគឺក្រោយការវាយប្រហារដោយក្រុមសកម្មប្រយុទ្ធប៉ាឡេស្ទីនហាម៉ាសទៅលើអ៊ីស្រាអែលដែលបង្កឱ្យមានសង្រ្គាមនៅតំបន់ហ្កាហ្សាដល់សព្វថ្ងៃ។

យោធាអ៊ីស្រាអែលបាននិយាយកាលពីសប្តាហ៍មុនថា ខ្លួនបានវាយប្រហារផ្លូវឆ្លងកាត់នៅតាមព្រំដែនស៊ីរី-លីបង់ ដែលត្រូវបានប្រើដើម្បីដឹកជញ្ជូនអាវុធទៅឲ្យក្រុមហេសបូឡា៕