ក្រុមសិទ្ធិមនុស្សកំពុងរិះគន់យ៉ាងខ្លាំងចំពោះការសម្រេចចិត្តរបស់ប្រធានាធិបតី Joe Biden ក្នុងការផ្តល់ឱ្យអ៊ុយក្រែននូវគ្រាប់មីនប្រឆាំងមនុស្ស ខណៈខ្លួនកំពុងតតាំងនឹងការឈ្លានពានរបស់រុស្ស៊ី។

ការសម្រេចចិត្តនេះផ្ទុយនឹងការសន្យាដែលលោក Biden បានធ្វើដើម្បីកម្រិតការប្រើប្រាស់គ្រាប់មីនបែបនេះកាលពីឆ្នាំ២០២២ និងកើតឡើងនៅពេលលោក Biden ត្រៀមខ្លួនចុះចេញពីតំណែង និងឆ្លុះបញ្ចាំងពីការព្រួយបារម្ភរបស់សហរដ្ឋអាមេរិកដែលចេះតែកើនឡើងលើសមរភូមិប្រយុទ្ធរបស់រុស្ស៊ីនៅភាគខាងកើតអ៊ុយក្រែន។

ប៉ុន្តែទោះបីជាប្រភេទគ្រាប់មីនដែលក្រុមលោកBiden កំពុងប្រគល់ឱ្យអ៊ុយក្រែន មានការការពារជាក់លាក់ក៏ដោយ ក៏ក្រុមសិទ្ធិមនុស្សបានព្រមានថា អាវុធបែបនេះ បង្កគ្រោះថ្នាក់ជាពិសេស និងយូរអង្វែង។

លោក ហ៊ីខឹម ខាដ្រាវី (Hichem Khadhraoui) នាយកប្រតិបត្តិនៃមជ្ឈមណ្ឌលសម្រាប់ជនស៊ីវិលក្នុងក្រុមតស៊ូមតិជម្លោះបាននិយាយថា គ្រាប់មីនប្រឆាំងមនុស្សគឺជាអាវុធដែលសម្លាប់មនុស្សមិនរើសមុខពិសេសជនស៊ីវិល និងកុមារ ជាច្រើនជំនាន់បន្ទាប់ពីសង្គ្រាមបានបញ្ចប់ ។អាវុធទាំងនេះមិនអាចបែងចែករវាងជនស៊ីវិល និងប្រយុទ្ធជន ដូចដែលតម្រូវដោយច្បាប់មនុស្សធម៌អន្តរជាតិទេ។

លោក Ben Linden មន្ត្រីជាន់ខ្ពស់នៃអង្គការលើកលែងទោសអន្តរជាតិសហរដ្ឋអាមេរិក បាននិយាយថាពិតជាគួរឱ្យរន្ធត់ និងតក់ស្លុតណាស់ ដែលលោកប្រធានាធិបតី Biden បានសម្រេចចិត្តដ៏គ្រោះថ្នាក់ បែបនេះ មុនពេលកេរ្តិ៍ដំណែលសេវាសាធារណៈរបស់លោកត្រូវបានបិទបញ្ចប់ក្នុងសៀវភៅប្រវត្តិសាស្ត្រ៕