ប្រធានាធិបតីប្រទេសកេនយ៉ា លោក វីល្លៀម រូតូ (William Ruto)កាលពីថ្ងៃពុធ បានថ្កោលទោសការកើនឡើងដ៏គួរឲ្យព្រួយបារម្ភនៃករណីឃាតកម្មលើស្ត្រី នៅទូទាំងប្រទេស ដោយជំរុញឲ្យមានការខិតខំប្រឹងប្រែងរួមគ្នា ដើម្បីការពារស្ត្រីពីអំពើហិង្សាផ្អែកលើយេនឌ័រ។

លោក រូតូ ដែលបានថ្លែងសុន្ទរកថាក្នុងសន្និសីទសារព័ត៌មានតាមទូរទស្សន៍ នៅទីក្រុងណៃរ៉ូប៊ី រដ្ឋធានីនៃប្រទេសកេនយ៉ា បន្ទាប់ពីបានជួបជាមួយសមាជិកសភាស្ត្រី បាននិយាយថា រដ្ឋាភិបាលរបស់លោក នឹង ផ្តល់ប្រាក់ចំនួន ១០០លាន ស៊ីលលីងកេនយ៉ា (ប្រហែល ៧៧៣.000 ដុល្លារអាមេរិក) សម្រាប់យុទ្ធនាការលើកកម្ពស់ការយល់ដឹងនៅទូទាំងប្រទេស ប្រឆាំងនឹងអំពើហិង្សាផ្អែកលើយេនឌ័រ។

លោកបានថ្លែងថា៖«ខ្ញុំបានណែនាំដល់អ្នកប្រតិបត្តិផ្នែកយុត្តិធម៌ព្រហ្មទណ្ឌ ឲ្យអនុវត្តអាណត្តិរបស់ពួកគេដោយមិនបង្អង់យូរ និងចាប់ជនល្មើសនៃការធ្វើអត្តឃាតស្ត្រីឲ្យទទួលខុសត្រូវទាំងស្រុង» ដោយបានបញ្ជាក់ថា ទឹកប្រាក់នេះ នឹងត្រូវផ្តល់ឲ្យសម្រាប់យុទ្ធនាការផ្ទះមានសុវត្ថិភាព ទីកន្លែងមានសុវត្ថិភាព ( Safe Homes, Safe Spaces)។

ស្ថិតិរបស់នគរបាល បានបង្ហាញថា ស្ត្រីជាង ១០០នាក់ ត្រូវបានសម្លាប់នៅក្នុងឧបទ្ទវហេតុដាច់ដោយឡែកពីគ្នា នៅចន្លោះខែសីហា និងខែវិច្ឆិកា ដោយបានសង្កត់ធ្ងន់ពីតម្រូវការបន្ទាន់សម្រាប់សកម្មភាព ផ្តោតការយកចិត្តទុកដាក់ និងការសហការគ្នា ដើម្បីដោះស្រាយបញ្ហារីករាលដាលនៃអំពើហិង្សាផ្អែកលើយេនឌ័រ នៅក្នុងសង្គម។

យោងតាមនគរបាល បានឲ្យដឹងថា ប្រហែល ៩០ភាគរយនៃករណីឃាតកម្មលើស្ត្រី ត្រូវបានស៊ើបអង្កេតយ៉ាងហ្មត់ចត់ រហូតឈានដល់ការចាប់ខ្លួនជនសង្ស័យ ដោយពេលនេះ ការកាត់ក្តី កំពុងដំណើរការ។