សកម្មជននៅឯសន្និសីទបម្រែបម្រួលអាកាសធាតុរបស់អង្គការសហប្រជាជាតិ(COP29) បានសម្តែងការខកចិត្ត នៅថ្ងៃព្រហស្បតិ៍ ទី២១ ខែវិច្ឆិកានេះ ជុំវិញពង្រាងកិច្ចព្រមព្រៀង ដែលបានបង្ហាញពីកិច្ចព្រមព្រៀងតិចតួចប៉ុណ្ណោះ រវាងបណ្តាប្រទេសទាំងអស់លើចំនួនមូលនិធិប្រទេសអភិវឌ្ឍន៍ផ្តល់ឲ្យ ដែលនឹងផ្តល់ជំនួយដល់ប្រទេសក្រីក្រដើម្បីដោះស្រាយបញ្ហាបម្រែបម្រួលអាកាសធាតុ និងការផ្លាស់ប្តូរប្រព័ន្ធថាមពលរបស់ពួកគេ។

ការខ្វែងគំនិតគ្នា និងការមិនសប្បាយចិត្ត បានលាតត្រដាងនៅថ្ងៃព្រហស្បតិ៍នេះក្នុងកិច្ចប្រជុំកំពូលស្តីពីអាកាសធាតុរបស់អង្គការសហប្រជាជាតិនៅទីក្រុងបាគូ ប្រទេសអាស៊ែបៃហ្សង់ ដែលសំណើសម្រាប់កិច្ចព្រមព្រៀងហិរញ្ញវត្ថុសកលថ្មី បានផ្តល់នូវជម្រើស២ផ្សេងគ្នា ដែលគ្មាននរណាម្នាក់សប្បាយចិត្ត ខណៈកាលបរិច្ឆេទបិទ ខិតចូលមកដល់។

ខណៈកិច្ចប្រជុំកំពូល គ្រោងនឹងបញ្ចប់នៅថ្ងៃសុក្រ ទី២២ ខែវិច្ឆិកា ឯកសារថ្មីបានបង្ហាញថានៅមានបញ្ហាសេសសល់ច្រើនដែលត្រូវសម្រេចលើបញ្ហាសំខាន់ៗដូចជា តើមានតួលេខមូលនិធិប្រចាំឆ្នាំប៉ុន្មាន នរណាជាអ្នកបង់ និងមានចំនួនប៉ុន្មាន។

លោកស្រី Claire Miranda សមាជិកនៃចលនាប្រជាជនអាស៊ី ទទួលបន្ទុកបំណុល និងការអភិវឌ្ឍន៍ បាននិយាយថា ពង្រាងកិច្ចព្រមព្រៀង បានបង្ហាញពីកង្វះភាពរីចម្រើនក្នុងការចរចា ដែលបានដំណើរការចាប់តាំងពីថ្ងៃទី១១ ខែវិច្ឆិកា។

លោកស្រី និយាយថា ប្រទេសអភិវឌ្ឍន៍ ត្រូវទទួលខុសត្រូវទាំងពេលបច្ចុប្បន្ន និងជាប្រវត្តិសាស្ត្រ សម្រាប់ការបំភាយឧស្ម័នផ្ទះកញ្ចក់ភាគច្រើន ដូច្នេះពួកគេត្រូវការផ្តល់មូលនិធិដល់ប្រទេសកំពុងអភិវឌ្ឍ និងអភិវឌ្ឍតិចសកលខាងត្បូង(Global South) ជាអ្នកដែលបាននិយាយថា ពួកគេជួបប្រទះផលប៉ះពាល់ធ្ងន់ធ្ងរបំផុតនៃបម្រែបម្រួលអាកាសធាតុ។