អង្គការឃ្លាំមើលសិទ្ធិមនុស្ស (HRW) ដែលមានទីស្នាក់ការនៅទីក្រុងញូវយ៉ក បាននិយាយថា គ្រាប់មីនប្រឆាំងមនុស្ស ដែលអាមេរិកនឹងផ្គត់ផ្គង់ដល់របបទីក្រុងគិវ នឹងរួមចំណែកដល់ការរងទុក្ខវេទនារបស់ជនស៊ីវិល ហើយទីក្រុងវ៉ាស៊ីនតោន ត្រូវតែពិចារណាឡើងវិញនូវការសម្រេចចិត្តរបស់ខ្លួន។

អង្គការនេះ បាននិយាយនៅក្នុងសេចក្តីថ្លែងការណ៍មួយនៅលើគេហទំព័ររបស់ខ្លួនថា៖«ការសម្រេចចិត្តរបស់រដ្ឋបាលលោក បៃដិន ( Biden) ក្នុងការបញ្ជូនគ្រាប់មីនប្រឆាំងមនុស្សដែលត្រូវបានហាមឃាត់ជាអន្តរជាតិ ទៅកាន់ប្រទេសអ៊ុយក្រែន ធ្វើឲ្យមានគ្រោះថ្នាក់ដល់ជីវិតជនស៊ីវិល»។

លោកស្រី Mary Wareham អនុប្រធានផ្នែកដោះស្រាយវិបត្តិ ជម្លោះ និងសព្វាវុធ នៅអង្គការ HRW បាននិយាយថា៖«ការសម្រេចចិត្តរបស់លោកប្រធានាធិបតី បៃដិន ក្នុងការបញ្ជូនគ្រាប់មីនប្រឆាំងមនុស្ស បង្កគ្រោះថ្នាក់ដល់អាយុជីវិតជនស៊ីវិល និងកាត់បន្ថយកិច្ចខិតខំប្រឹងប្រែងរបស់អន្តរជាតិ ក្នុងការលុបបំបាត់អាវុធខុសច្បាស់ទាំងនេះ»។ លោកស្រី បានបន្ថែមថា៖ «សហរដ្ឋអាមេរិក គួរតែបដិសេធការសម្រេចចិត្តដ៏គួរឲ្យស្អប់ខ្ពើមនេះ ដែលបង្កើនហានិភ័យនៃការរងទុក្ខរបស់ជនស៊ីវិល ក្នុងរយៈពេលខ្លី និង   រយៈពេលវែងប៉ុណ្ណោះ»។

មុននេះ មន្ទីរបញ្ចកោណ បានបញ្ជាក់ថា រដ្ឋបាលអាមេរិក បានអនុម័តការប្រើប្រាស់គ្រាប់មីនប្រឆាំងមនុស្ស នៅក្នុងប្រទេសអ៊ុយក្រែន។ ទីភ្នាក់ងារនេះ បានបញ្ជាក់ថា ខ្លួននឹងផ្គត់ផ្គង់ដល់របបទីក្រុងគីវនូវ     «គ្រាប់មីនប្រឆាំងមនុស្ស»ដែលមានសុវត្ថិភាពជាងមុន ពីព្រោះពួកគេបាត់បង់សមត្ថភាព ក្នុងការបំផ្ទុះ នៅពេលហួសពេលវេលាកំណត់។