រដ្ឋមន្រ្តីមកពីរដ្ឋសមាជិកសហភាពអឺរ៉ុប បានព្រមានពីផលវិបាកនៃលទ្ធភាពនៃការដំឡើងពន្ធរបស់សហរដ្ឋអាមេរិក ពេលដែលពួកគេជួបជុំគ្នានៅទីក្រុងព្រុចសែល ប្រទេសបែលហ្ស៊ិកនាថ្ងៃព្រហស្បតិ៍នេះ ក៏ដូចជាបញ្ហាកិច្ចព្រមព្រៀងសហភាពអឺរ៉ុប-ម៉េកូស័រ(EU- Mercosur)។

លោក Martin Kocher គឺជារដ្ឋមន្រ្តីក្រសួងការងារ និងសេដ្ឋកិច្ចអូទ្រីស បានធ្វើការសង្កត់ធ្ងន់ថា គ្មានភាគីណាមួយអាចចំណេញពីសង្រ្គាមពាណិជ្ជកម្មនោះឡើយ ពេលដែលលោកបានធ្វើដំណើរទៅដល់កិច្ចប្រជុំពាណិជ្ជកម្មជាមួយសហការីរបស់លោក ។

ប្រធានាធិបតីជាប់ឆ្នោតសហរដ្ឋអាមេរិកមកពីគណបក្សសាធារណរដ្ឋលោក Donald Trump បានប្រកាសដំឡើងពន្ធខ្ពស់ជាងមុន អំឡុងយុទ្ធនាការបោះឆ្នោតរបស់លោក ដែលនឹងធ្វើឲ្យប៉ះពាល់ផងដែរដល់សហភាពអឺរ៉ុប ។

លោក Kocher និយាយថា អឺរ៉ុបនាំចេញទំនិញច្រើនជាងទៅកាន់សហរដ្ឋអាមេរិក ដែលមានន័យថា វានឹងធ្វើឲ្យប៉ះពាល់ដោយសារការដំឡើងពន្ធលើទំនិញ ។ ផ្ទុយទៅវិញ ការផ្គត់ផ្គង់សេវាកម្មពីសហរដ្ឋអាមេរិកទៅកាន់អឺរ៉ុប គឺសំខាន់សម្រាប់សហរដ្ឋអាមេរិក ។ នេះមានន័យថា បើសិនជាមាននូវការរឹតត្បិត បន្ទាប់មកសហរដ្ឋអាមេរិកនឹងរងផលប៉ះពាល់ដូចគ្នា ។

ខណៈពេលនោះដែរ រដ្ឋមន្រ្តីប្រតិភូបារាំងទទួលបន្ទុកពាណិជ្ជកម្មក្រៅប្រទេសអ្នកស្រី Sophie Primas និយាយថា ប្រទេសមួយចំនួន ជាពិសេសប្រទេសមកពីប្លុកម៉េកូស័រ ស្ទាក់ស្ទើបន្តនៅក្នុងកិច្ចព្រមព្រៀងអាកាសធាតុក្រុងប៉ារីស ។ 

អ្នកស្រីបន្តថា កិច្ចព្រមព្រៀងក្រុងប៉ារីស ត្រូវតែជាប្រការសំខាន់នៅក្នុងកិច្ចព្រមព្រៀងម៉េកូស័រ ហើយនៅអឺរ៉ុប ពួកយើងត្រូវតែយកចិត្តទុកដាក់លើភាពស៊ីសង្វាក់គ្នានៃគោលនយោបាយសាធារណៈរបស់ពួកយើង ៕