ប្រធានាធិបតីរុស្ស៊ី លោក វ្ល៉ាឌីមៀ ពូទីន បានព្រមានកាលពីថ្ងៃព្រហស្បតិ៍ (២១ វិច្ឆិកា) ថា សង្រ្គាមអ៊ុយក្រែន កំពុងកើនឡើងឆ្ពោះទៅរកជម្លោះជាសកលហើយ បន្ទាប់ពីសហរដ្ឋអាមេរិក និងអង់គ្លេស បានអនុញ្ញាតឱ្យអ៊ុយក្រែន វាយប្រហាររុស្ស៊ី ដោយអាវុធរបស់ពួកគេ ហើយបានព្រមានលោកខាងលិចថា ទីក្រុងមូស្គូ អាចវាយប្រហារតបវិញយ៉ាងខ្លាំងក្លា។

ប្រមុខវិមានក្រឹមឡាំងរូបនេះបន្តថា រុស្ស៊ីបានឆ្លើយតបទៅនឹងការប្រើប្រាស់មីស៊ីលរបស់អាមេរិក និងអង់គ្លេស ដោយការបាញ់ប្រភេទថ្មីនៃមីស៊ីលបាលីស្ទិករយៈចម្ងាយមធ្យមល្បឿនលឿនជាងសំឡេងនៅទីតាំងយោធាអ៊ុយក្រែន ដោយព្រមានថា ការវាយប្រហារបន្ថែមទៀតអាចនឹងកើតឡើង ហើយជនស៊ីវិលនឹងត្រូវបានព្រមានមុនការវាយប្រហារបន្ថែមទៀតដោយអាវុធបែបនេះ។

លោក ពូទីន បានថ្លែងនៅក្នុងសុន្ទរកថាទៅកាន់ប្រជាជាតិ ដែលធ្វើឡើងដោយទូរទស្សន៍រដ្ឋនៅទីក្រុងមូស្គូថា "ចាប់ពីពេលដែលអ៊ុយក្រែន ប្រើមីស៊ីលលោកខាងលិចវាយជ្រៅលើទឹកដីរុស្ស៊ីមក ជម្លោះក្នុងតំបន់នៅអ៊ុយក្រែន ដែលបង្កឡើងដោយលោកខាងលិចពីមុន ឥឡូវនេះមានលក្ខណៈជាសកលហើយ"។ លោក ពូទីន បន្ថែមថា សហរដ្ឋអាមេរិក កំពុងរុញពិភពលោកឆ្ពោះទៅរកសង្រ្គាមលោក។

គួររម្លឹកថា អ៊ុយក្រែន និងលោកខាងលិចគិតថា ការវាយលុកឆ្នាំ២០២២ របស់លោក ពូទីន គឺជាការប៉ុនប៉ងតាមបែបចក្រពត្តិនិយម ដើម្បីដណ្តើមយកអធិបតេយ្យភាពនៃទឹកដីអ៊ុយក្រែន ហើយថា ពួកគេខ្លាចរុស្ស៊ី អាចព្យាយាមវាយប្រហារសមាជិកណាតូ នៅថ្ងៃណាមួយ ប្រសិនបើលោក ពូទីន ឈ្នះនៅអ៊ុយក្រែន៕