ក្រសួងការពារជាតិរុស្ស៊ី បាននិយាយកាលពីថ្ងៃព្រហស្បតិ៍ (២១ វិច្ឆិកា) ថា កងកម្លាំងរបស់ខ្លួនបានវាយដណ្តើមយកភូមិមួយទៀតនៅភាគខាងកើតអ៊ុយក្រែន គឺភូមិ ដាលនេ (Dalne) ក្នុងតំបន់ ដូណិត (Donetsk) ដែលជាចំណុចបង្គោលនៃការវាយរុលរបស់ពួកគេនៅក្នុងសង្គ្រាមដែលមានអាយុកាល ៣៣ខែ។

អគ្គសេនាធិការអ៊ុយក្រែន មិនបានទទួលស្គាល់ថាភូមិ Dalne ត្រូវរុស្ស៊ីយកបានទេ ប៉ុន្តែប្លុកយោធា DeepState ដ៏ពេញនិយមរបស់អ៊ុយក្រែន បាននិយាយថា ភូមិនេះធ្លាក់ក្នុងដៃរុស្ស៊ីហើយ។

របាយការណ៍ពេលយប់របស់យោធាអ៊ុយក្រែន បានលើកឡើងពីភូមិនេះថាជាភូមិមួយក្នុងចំណោមភូមិចំនួន៧ នៅក្នុងតំបន់ដែលកងកម្លាំងរុស្ស៊ី បានព្យាយាមទម្លុះប្រព័ន្ធការពារអ៊ុយក្រែនចំនួន ២៦ដងក្នុងរយៈពេល ២៤ម៉ោងកន្លងមក ខណៈការប៉ះទង្គិចប្រដាប់អាវុធ ១០កន្លែង ក្នុងចំណោម ១៦ នៅក្នុងតំបន់នេះបានបន្ត។

បន្ទាប់ពីបរាជ័យក្នុងការវាយរុលលើរដ្ឋធានីគីវ ក្នុងសប្តាហ៍ដំបូងនៃប្រតិបត្តិការយោធាពិសេសខែកុម្ភៈ ឆ្នាំ២០២២ កងទ័ពរុស្ស៊ី បានផ្តោតលើការចាប់យកតំបន់ ដុនបាស (Donbas) ដែលបង្កើតឡើងដោយតំបន់ Donetsk និង Luhansk។ ពួកគេបានដណ្តើមយកភូមិជាបន្តបន្ទាប់ ក្នុងការវាយឆ្ពោះទៅទិសខាងលិចជាលំដាប់របស់ខ្លួនតាមតំបន់ Donetsk៕