ការបាញ់កាំភ្លើងយ៉ាងខ្លាំងក្លាបានផ្ទុះឡើងនៅក្នុងរដ្ឋធានី ជូបា (Juba) នៃប្រទេសស៊ូដង់ខាងត្បូង កាលពីល្ងាចថ្ងៃព្រហស្បតិ៍ (២១ វិច្ឆិកា) បន្ទាប់ពីកងកម្លាំងសន្តិសុខបានសម្រុកទៅចាប់ខ្លួនអតីតប្រធានផ្នែកចារកម្ម នេះបើយោងតាមអ្នករាយការណ៍ពីសារព័ត៌មានរ៉យទ័រ និងការជូនដំណឹងមួយផ្ញើទៅកាន់បុគ្គលិកអង្គការសហប្រជាជាតិ។

សេចក្ដីរាយការណ៍បានឱ្យដឹងថា ការបាញ់ប្រហារនោះបានចាប់ផ្តើមនៅម៉ោង ៧យប់ (ម៉ោងក្នុងស្រុក) និងបានបន្តជាងមួយម៉ោង ខណៈការជូនដំណឹងសុវត្ថិភាពរបស់អង្គការសហប្រជាជាតិចំពោះបុគ្គលិកនៅក្នុងទីក្រុង Juba បាននិយាយថា ហិង្សានេះគឺទាក់ទងទៅនឹងការចាប់ខ្លួនអតីតប្រធានសេវាសន្តិសុខជាតិ (NSS) ឈ្មោះ Akol Koor Kuc ដែលត្រូវបានដកតំណែងកាលពីដើមខែតុលា។

ក្រុមអ្នកវិភាគលើកឡើងថា ការទម្លាក់លោក Akol Koor ពីតំណែង បានឆ្លុះបញ្ចាំងពីការតស៊ូអំណាចនៅថ្នាក់ខ្ពស់របស់រដ្ឋាភិបាល។ គួរបញ្ជាក់ថា ហិង្សានេះបានកើតឡើងប៉ុន្មានសប្តាហ៍ប៉ុណ្ណោះ បន្ទាប់ពីរដ្ឋាភិបាលអន្តរកាលប្រកាសថា ការបោះឆ្នោតដែលរំពឹងទុកនៅក្នុងខែធ្នូ នឹងត្រូវបានពន្យារពេលជាលើកទីពីរ៕