ក្រុមមន្រ្តីសុខាភិបាលក្នុងស្រុកបាននិយាយកាលពីថ្ងៃព្រហស្បតិ៍ (២១ វិច្ឆិកា) ថា តួលេខអ្នកស្លាប់នៅក្នុងតំបន់ហ្កាហ្សាស្រ្ទីប ដោយសារជម្លោះដ៏បង្ហូរឈាមអាយុកាល ១៣ខែរវាងអ៊ីស្រាអែល និងក្រុមសកម្មប្រយុទ្ធហាម៉ាស បានកើនឡើងលើស ៤៤.០០០នាក់ហើយ។

ក្រសួងសុខាភិបាលដែនដីហ្កាហ្សានេះមិនបែងចែករវាងជនស៊ីវិល និងអ្នកប្រយុទ្ធក្នុងតួលេខអ្នកស្លាប់នោះទេ ប៉ុន្តែបាននិយាយថា ចំនួនលើសពីពាក់កណ្ដាលក្នុងការស្លាប់ទាំងនោះគឺស្ត្រី និងកុមារ។ យោធាអ៊ីស្រាអែល និយាយថា ខ្លួនបានសម្លាប់អ្នកប្រយុទ្ធជាង ១៧.០០០នាក់ ដោយមិនបានផ្ដល់ភស្តុតាងឡើយ។

ក្រសួងសុខាភិបាលហ្កាហ្សានិយាយថា គិតត្រឹមថ្ងៃព្រហស្បតិ៍ ២១ វិច្ឆិកា មនុស្សចំនួន ៤៤.០៥៦នាក់ត្រូវបានសម្លាប់ និង ១០៤.២៦៨នាក់បានរងរបួស ចាប់តាំងពីសង្គ្រាមចាប់ផ្តើម ខណៈចំនួនអ្នកស្លាប់ពិតប្រាកដគឺខ្ពស់ជាងនេះ ដោយសារតែសាកសពរាប់ពាន់នាក់ត្រូវបានកប់នៅក្រោមគំនរបាក់បែក ឬនៅក្នុងតំបន់ដែលក្រុមសង្រ្គោះមិនអាចទៅដល់។

សង្គ្រាមដ៏បង្ហូរឈាមនេះបានចាប់ផ្តើមនៅពេលដែលពួកសកម្មប្រយុទ្ធដឹកនាំដោយក្រុមហាម៉ាស បានវាយលុកចូលទៅក្នុងភាគខាងត្បូងអ៊ីស្រាអែល កាលពីថ្ងៃទី០៧ ខែតុលា ឆ្នាំ២០២៣ ដោយសម្លាប់មនុស្សប្រហែល ១.២០០នាក់ ដែលភាគច្រើនជាជនស៊ីវិល និងបានចាប់ខ្លួនមនុស្ស ២៥០នាក់ទៀត។

ចំណាប់ខ្មាំងប្រហែល ១០០នាក់ នៅតែស្ថិតនៅក្នុងតំបន់ហ្កាហ្សា ដែលយ៉ាងហោចណាស់មួយភាគបីនៃអ្នកទាំងនោះត្រូវគេជឿថាបានស្លាប់ ហើយភាគច្រើននៃអ្នកនៅសល់ត្រូវបានដោះលែងក្នុងអំឡុងពេលបទឈប់បាញ់កាលពីឆ្នាំមុន៕