ភ្នំពេញ៖ សហគ្រិនខ្មែរ កំពុងរៀបចំព្រឹត្តិការណ៍មួយដែលមានរយៈពេលពីរថ្ងៃ ចាប់ពីថ្ងៃទី២៤ ដល់២៥ ខែវិច្ឆិកា ឆ្នាំ ២០២៤ នៅសាលពិព័រណ៍កោះពេជ្រ ក្នុងគោលបំណងលើកកម្ពស់នវានុវត្តន៍ សហគ្រិនភាព និងកិច្ចសហប្រតិបត្តិការ ដែល នឹងផ្តល់សារៈសំខាន់ក្នុងការជំរុញការរីកចម្រើន និងការអភិវឌ្ឍនៅក្នុងប្រព័ន្ធអេកូឡូស៊ីសហគ្រិនភាពនៅកម្ពុជា។

យោងតាមសហគ្រិនខ្មែរ (Khmer Enterprise) បានឲ្យដឹងថា ព្រឹត្តិការណ៍នេះ នឹងបង្ហាញនូវសកម្មភាពជាបន្តបន្ទាប់ដែលរៀបចំឡើងក្នុងគោលបំណងទាក់ទាញអ្នកចូលរួមមកពី វិស័យសាធារណៈ និងឯកជន។ ព្រឹត្តិការណ៍នេះដែរ នឹងបើកឲ្យ មានការចូលរួមពីសាធារណជន និងដៃគូពាក់ព័ន្ធនានា។ ដោយឡែក អ្នកចូលរួមទាំងអស់ក្នុងកម្មវិធី នឹងមានឱកាសបង្កើតបណ្តាញទំនាក់ទំនង ដែលសម្រិតសម្រាងឡើងក្នុងគោលបំណងផ្សាភ្ជាប់សហគ្រិន ម្ចាស់អាជីវកម្ម និងស្ថាប័នពាក់ព័ន្ធ ក្នុងការជំរុញនវានុវត្តន៏និងវឌ្ឍនភាពសេដ្ឋកិច្ចនៅកម្ពុជា។

ប្រភពដដែល បានឲ្យដឹងទៀតថា ទិវាប្រព័ន្ធអេកូឡូស៊ីសហគ្រិនភាពឆ្នាំ២០២៤ គឺជាឱកាសមួយសម្រាប់សហគ្រិនក្នុងការបង្ហាញពីភាពច្នៃប្រឌិត និងនវានុវត្តន៍ដែលកើតឡើងពីការគាំទ្ររបស់ដៃគូសហការរាប់បញ្ចូលទាំងសហគ្រិនខ្មែរ និងស្ថាប័ននៅក្នុងប្រព័ន្ធអេកូឡូស៊ីមានចាប់ពីកម្រិតវិទ្យាល័យ មហាវិទ្យាល័យ ធុរកិច្ចថ្មី និងសហគ្រាសធុនតូច និងមធ្យម។ ព្រឹត្តិការណ៍នេះ បានរំលេចទៅដោយកម្មវិធីសំខាន់ៗរួមមាន៖ កម្មវិធីការវិនិយោគដើម្បីផលវិជ្ជមាន, កម្មវិធីប្រព័ន្ធ អេកូឡូស៊ីសហគ្រិនភាព, ពិធីសម្ពោធន៍កម្មវិធីសហគ្រិនមហាវិទ្យាល័យ, កម្មវិធីយុវជនឆ្ពោះទៅអាជីវកម្ម, និងពិធីប្រគល់ពានរង្វាន់សហគ្រិនខ្មែរ។ព្រឹត្តិការណ៍ដ៏មានសារសំខាន់នេះដែរ ក៏មានគោលបំណងផ្តល់ឲ្យអ្នកចូលរួមមានឱកាសក្នុងការបង្កើតបណ្តាញទំនាក់ទំនងអាជីវកម្មទៅកាន់វិនិយោគិនអន្តរជាតិ៕អត្ថបទ ឈិត បូរ៉ាវី