គណៈកម្មាធិការមហាសន្និបាតអង្គការសហប្រជាជាតិ (UN) ដ៏សំខាន់មួយ បានអនុម័តសេចក្ដីសម្រេច កាលពីល្ងាចថ្ងៃសុក្រ (ទី២២ ខែវិច្ឆិកា) ដើម្បីបើកផ្លូវឲ្យមានការចរចាលើសន្ធិសញ្ញាមិនធ្លាប់មានលើកដំបូង ស្តីពីការទប់ស្កាត់ និងការដាក់ទណ្ឌកម្ម ចំពោះការប្រព្រឹត្តិឧក្រិដ្ឋកម្មប្រឆាំងមនុស្សជាតិ បន្ទាប់ពីប្រទេសរុស្ស៊ីបានទម្លាក់ការធ្វើវិសោធនកម្មដែលនឹងរំខានដល់កិច្ចខិតខំប្រឹងប្រែងនេះ។

សេចក្ដីសម្រេចនេះត្រូវបានអនុម័តដោយការឯកភាពពីគណៈកម្មាធិច្បាប់របស់មហាសន្និបាត ដែលរួមមានសមាជិកទាំង ១៩៣ប្រទេសរបស់ UN បន្ទាប់ពីមាននូវការចរចារដ៏តានតឹងដំណាក់កាលចុងក្រោយ រវាងអ្នកគាំទ្រកិច្ចប្រឹងប្រែងនេះ និងរុស្ស៊ីដែលបានអូសបន្លាយពេលពេញមួយថ្ងៃ។

មានការអបអរសាទរយ៉ាងខ្លាំង នៅពេលដែលប្រធានគណៈកម្មាធិការ បានផ្តល់ការយល់ព្រមលើសេចក្ដីសម្រេចនេះ។ ហើយវាស្ទើរតែប្រាកដណាស់ថា សេចក្ដីសម្រេចនេះនឹងត្រូវបានអនុម័តនៅពេលដែលមហាសន្និបាតដាក់ឲ្យបោះឆ្នោតចុងក្រោយ នៅថ្ងៃទី៤ ខែធ្នូ។

ទីប្រឹក្សាច្បាប់ជាន់ខ្ពស់របស់អង្គការឃ្លាំមើលសិទ្ធិមនុស្ស លោក Richard Dicker បាននិយាយប្រាប់សារព័ត៌មាន The Associated Press (AP) ថា៖ «កិច្ចព្រមព្រៀងថ្ងៃនេះ ដើម្បីចាប់ផ្តើមការចរចា លើសន្ធិសញ្ញាអន្តរជាតិដែលត្រូវការជាខ្លាំង គឺជាសមិទ្ធិផលប្រវត្តិសាស្ត្រដែលទន្ទឹងរង់ចាំជាយូរមកហើយ»។

លោកបានបន្ថែមថា៖ «វាជាការផ្ញើសារដ៏សំខាន់មួយថា និទណ្ឌភាព ចំពោះប្រភេទឧក្រិដ្ឋកម្ម ដែលកើតមានលើជនស៊ីវិល នៅក្នុងប្រទេសអេត្យូពី ស៊ូដង់ អ៊ុយក្រែន ភាគខាងត្បូងអ៊ីស្រាអែល តំបន់ហ្កាហ្សា និងសហភាពមីយ៉ាន់ម៉ា នឹងមិនត្រូវបានប្រងើយកន្តើយទៀតឡើយ»។

គួរបញ្ជាក់ថា សេចក្ដីសម្រេចនេះអំពាវនាវឲ្យមានដំណើរការកំណត់ពេលវេលា ជាមួយនឹងសម័យប្រជុំរៀបចំ ក្នុងឆ្នាំ២០២៦ និងឆ្នាំ២០២៧ និងសម័យប្រជុំចរចារយៈពេល ៣សប្តាហ៍ ក្នុងឆ្នាំ២០២៨ និងឆ្នាំ២០២៩ ដើម្បីបញ្ចប់ទាំងស្រុងនូវសន្ធិសញ្ញា ស្តីពីឧក្រិដ្ឋកម្មប្រឆាំងមនុស្សជាតិ៕