ភ្នំពេញ៖ ក្រសួងទេសចរណ៍កម្ពុជា មានគោលបំណង គ្រោងសហការជាមួយអាជ្ញាធរប្រទេសថៃ ក្នុងការរៀបចំនូវទិដ្ឋាការតែមួយ សម្រាប់ប្រទេសពីរ (កម្ពុជា-ថៃ) ដើម្បីជំរុញកំណើនទេសចរណ៍អន្តរជាតិ ឲ្យកាន់តែមានការកើនឡើង ក្រោយបញ្ចប់នូវវិបត្តិកូវីដ១៩ ។

ក្នុងជំនួបជាមួយឯកឧត្តម វឌ្ឍនា ពុទ្ធីឆាត អភិបាលខេត្តស៊ីសាកេត ប្រទេសថៃ កាលពីពេលថ្មីៗនេះ ឯកឧត្តមបណ្ឌិត សុខ សុក្រឹត្យា ទីប្រឹក្សាផ្ទាល់សម្តេចតេជោនាយករដ្ឋមន្ត្រី និងជារដ្ឋលេខាធិការក្រសួងទេសចរណ៍ មានប្រសាសន៍ថា កម្ពុជាមានគោលបំណងសហការ ជំរុញយុទ្ធនាការ “ព្រះរាជាណាចក្រពីរ គោលដៅទេសចរណ៍តែមួយ” តាមរយៈការរៀបចំបើកគម្រោង “ទិដ្ឋាការមួយសម្រាប់ប្រទេសពីរ” និងពិភាក្សាបន្ថែមអំពីកិច្ចសហការជាមួយខេត្តស៊ីសាកេត ក្នុងការបើកទិដ្ឋាការតែមួយ ដើម្បីទទួលទេសចរអន្តរជាតិ ចូលមកទស្សនាប្រទេសទាំងពីរ ។

 ភាគីកម្ពុជា ក៏បានជំរាបទៅកាន់ភាគីថៃថា នាពេលថ្មីៗនេះ រាជរដ្ឋាភិបាលកម្ពុជាបានអនុម័តដាក់ឱ្យប្រើប្រាស់ផែនការមេ អភិវឌ្ឍន៍ខេត្តសៀមរាប ឆ្នាំ២០២១-២០៣៥ ដោយជាឱកាស នៃការអភិវឌ្ឍផលិតផលទេសចរណ៍បែបជំនឿសាសនា ដូចជាថ្វាយបង្គុមព្រះពុទ្ធរូបបុរាណ ៩វត្ត និងការគោរពបូជាបដិមារសក្តិសិទ្ធិ ៩ទីតាំង នៅតំបន់អង្គរ និងលើភ្នំគូលែនជាដើម ។ 

ក្នុងជំនួបនោះអភិបាលខេត្តស៊ីសាកេត បានថ្លែងថា បច្ចុប្បន្នក្រុមអ្នកទេសចរជនជាតិថៃ ចូលចិត្តធ្វើដំណើរឆ្លងកាត់ព្រំដែន ជាប្រភេទទេសចរបែបផ្សងព្រេង ឆ្ពោះទៅកាន់ខេត្តសៀមរាប តាមច្រកអន្តរជាតិជាំ-សាង៉ាំ ដោយជាទូទៅក្រុមអ្នកទេសចរប្រភេទផ្សងព្រេងទាំងនោះ ចូលចិត្តចំណាយពេលស្នាក់នៅចាប់ពី៣ថ្ងៃឡើងទៅ ដែលពួកគេមានការចំណាយខ្ពស់ (High buying power) ។

ជាមួយគ្នានោះឯកឧត្តមបណ្ឌិត សុខ សុក្រឹត្យា បានបន្តថា កម្ពុជាក៏ចង់ធ្វើកិច្ចសហការក្នុងការអភិវឌ្ឍ និងជំរុញវិស័យទេសចរណ៍នៅតាមព្រំដែនកម្ពុជា-ថៃ ជាពិសេសក្នុងភូមិសាស្រ្តខេត្តស៊ីសាកេត, ពង្រឹង និងពង្រីកទំនាក់ទំនងពាណិជ្ជកម្ម ការផ្លាស់ប្តូរផលិតផលកសិកម្ម និងផលិតផលធុនតូចនិងមធ្យម (SME) នៅតាមច្រកព្រំដែន, ពង្រឹងកិច្ចសហប្រតិបត្តិការ និងទំនាក់ទំនងអន្តរជាតិរវាងថៃ-កម្ពុជា, តភ្ជាប់ និងការធ្វើសមាហរណកម្មវិស័យអប់រំ, សុខភាពសាធារណៈ និងការថែទាំសុខភាពប្រជាពលរដ្ឋ និងការជំរុញកិច្ចសហការលើវិស័យកីឡារវាងកម្ពុជា-ថៃ, ការជំរុញផ្សព្វផ្សាយ និងអភិវឌ្ឍទីផ្សារតាមព្រំដែន និងការសម្រួលការដឹកជញ្ជូនទំនិញ និងបន្តកិច្ចសហការតាមដានស្ថានការណ៍រាតត្បាតនៃជំងឺកូវីដ-១៩ នៅតាមច្រកព្រំដែន ។ 

ជាចុងក្រោយ ឯកឧត្តមបណ្ឌិត សុខ សុក្រឹត្យា ក៏បានស្នើដល់ឯកឧត្តមអភិបាលខេត្តស៊ីសាកេត ជួយពិនិត្យលទ្ធភាពក្នុងការផ្តល់សេវាថែទាំសុខភាព និងសុវត្ថិភាពជូនប្រជាជនកម្ពុជាដែលរស់នៅតាមព្រំដែនកម្ពុជា-ថៃ និងពលករខ្មែរចំណាកស្រុក ដែលកំពុងធ្វើការក្នុងខេត្តថៃមួយនេះ ឱ្យដូចប្រជាជនថៃផងដែរ ៕អត្ថបទ​ ៖​ ចក់