​រុស្ស៊ី៖ ប្រធានាធិបតី​រុស្ស៊ី​លោក Vladimir Putin បាន​និយាយ​ថា ជំនួប​របស់​លោក​ជាមួយ​នាយករដ្ឋមន្ត្រី​អ៊ីស្រាអែល​លោក Naftali Bennett ពិតជា​ទទួល​បាន​ផ្លែផ្កា​។ ប្រទេស​រុស្ស៊ី និង​អ៊ីស្រាអែលបាន​បង្កើត​ទំនាក់ទំនង​នយោបាយ សេដ្ឋកិច្ច និង​វប្បធម៌យ៉ាង​ជិតស្និទ្ធ ដែល​បាន​ជួយប្រទេស​ទាំងពីរ​ដោះស្រាយ​បញ្ហាលំបាក និង​បញ្ហា​បែងចែកដូចជា​ស្ថានភាព​នៅ​ប្រទេសស៊ី​រី ដែល​ទីក្រុង​ម៉ូស្គូ​បាន​សហការ​ជាមួយទីក្រុង​តេ​អេ​រ៉ង់ ដើម្បី​គាំទ្រ​ការគ្រប់គ្រង​របស់​ប្រធានាធិបតី​ស៊ី​រី​លោក Bashar Assad​។

ប្រទេស​រុស្ស៊ី​បានធ្វើ​យុទ្ធនាការយោធា​នៅក្នុងប្រទេស​ស៊ី​រី​ចាប់តាំងពី​ឆ្នាំ២០១៥ ដោយបាន​ជួយ​រដ្ឋាភិបាល​របស់លោក Assad ដណ្តើមបាន​ការគ្រប់គ្រង​ភាគច្រើន​នៅក្នុង​ប្រទេស​វិញ​។ ទីក្រុង​ម៉ូស្គូបានជួយធ្វើ​ទំនើបកម្ម​យោធា​ប្រទេស​ស៊ី​រី រួមទាំង​ការផ្តល់​ប្រព័ន្ធការពារ​ដែន អាកាសដល់លោក ​Assad និង​បណ្តុះបណ្តាល​បុគ្គលិក​របស់​ប្រទេស​។ ប្រទេស​រុស្ស៊ី និង​អ៊ីស្រាអែលបាន​បង្កើត​ខ្សែ​ទូរស័ព្ទ​យោធា ដើម្បី​សម្របសម្រួល​ប្រតិបត្តិការ​កងទ័ពអាកាសលើប្រទេស​ស៊ី​រី ​ដើម្បី​បញ្ចៀស​ការប៉ះទង្គិច​គ្នា​។ ប្រទេស​អ៊ីស្រាអែលតែងតែ​វាយប្រហារ​លើ​គោលដៅ​ដែលមាន​ទំនាក់ទំនង​ជាមួយ​ប្រទេស​អ៊ីរ៉ង់ក្នុងប្រទេស​ស៊ី​រី ខណៈ​​រុស្ស៊ី​បាន​គាំទ្រ​ដល់​រដ្ឋាភិបាល​ស៊ី​រី​។ នៅក្នុង​ឆ្នាំ​២០១៨ ទីក្រុង​ម៉ូស្គូ​បាន​ជាប់គាំង​កិច្ច​ព្រមព្រៀង​ជាមួយ​ទីក្រុង​តេ​អេ​រ៉ង់ ក្នុងការ​ទប់ស្កាត់​អ្នក​ប្រយុទ្ធ​របស់ខ្លួន​ឱ្យនៅ​ឆ្ងាយ​ពី​តំបន់ Golan Heights ដើម្បី​សម្រួល​ដល់​ការព្រួយបារម្ភ​របស់​ប្រទេស​អ៊ីស្រាអែល​អំពី​វត្តមានរបស់​អ៊ីរ៉ង់​នៅក្នុង​ប្រទេស​ស៊ី​រី​។

ប្រទេស​រុស្ស៊ី​ជា​ភាគី​អន្តរជាតិ​មួយ​ដែល​បាន​ចរចា​កិច្ច​ព្រមព្រៀង​នុយក្លេអ៊ែរ​ឆ្នាំ២០១៥ ជាមួយ​ប្រទេស​អ៊ីរ៉ង់​។ កិច្ចព្រមព្រៀង​នេះ​បាន​បរាជ័យ​បន្ទាប់ពី​ប្រធានាធិបតី​លោក Donald Trump ​បាន​ដកខ្លួន​ចេញ​ក្នុង​ឆ្នាំ២០១៨​។ ប៉ុន្តែ​បច្ចុប្បន្នរដ្ឋបាល​សហរដ្ឋអាមេរិក​ថ្មីកំពុង​ព្យាយាម​ស្តារ​កិច្ចព្រមព្រៀង​ជាមួយ​មហាអំណាច​អន្តរជាតិដទៃទៀត ដែលជា​ជំហាន​មួយ​ដែល​ប្រទេស​អ៊ីស្រាអែល​ប្រឆាំង​៕

អត្ថបទ៖ ប៊ុនថន