ជនជាតិ​រ៉ូ​ហ៊ីង​យ៉ា​ ៦​នាក់​ស្លាប់​ក្នុង​ការ​ប៉ះទង្គិច​គ្នា​នៅ​ជុំរុំ​ប្រទេស​បង់​ក្លា​ដែ​ស​

ជនជាតិរ៉ូហ៊ីងយ៉ា ៦នាក់ស្លាប់ក្នុងការប៉ះទង្គិចគ្នានៅជុំរុំប្រទេសបង់ក្លាដែស

បង់ក្លាដែស៖ នគរបាលបាននិយាយថា ជនភៀសខ្លួនរ៉ូហ៊ីងយ៉ាពីរក្រុមបានប៉ះទង្គិចគ្នាកាលពីថ្ងៃសុក្រ នៅក្នុងជុំរុំមួយនៅភាគខាងត្បូងប្រទេសបង់ក្លាដែសបណ្ដាលឲ្យជនភៀសខ្លួនយ៉ាងតិច ៦នាក់ស្លាប់ និង ១០នាក់ផ្សេងទៀតរងរបួស។ លោក Shihab Kaiser Khan មេបញ្ជាការកងនគរបាលប្រដាប់អាវុធដែលមើលការខុសត្រូវជុំរុំបាននិយាយថា អំពើហិង្សាបានផ្ទុះឡើងនៅក្នុងស្រុក Cox's Bazar នៅពេលដែលភាគីម្ខាងបានបើកការបាញ់ប្រហារបណ្ដាលឲ្យមនុស្ស ៤នាក់ស្លាប់នៅកន្លែងកើតហេតុ។

លោក Khan បាននិយាយថា មនុស្សពីរនាក់ផ្សេងទៀតបានស្លាប់នៅក្នុងមន្ទីរពេទ្យ ខណៈពួកគេព្យាបាលរបួស។ ភ្លាមៗនោះគេនៅមិនទាន់ដឹងច្បាស់ថា ហេតុអ្វីបានជាអំពើហិង្សាផ្ទុះឡើង ប៉ុន្តែប្រព័ន្ធផ្សព្វផ្សាយក្នុងស្រុកបាននិយាយថា ភាគីទាំងពីរឈ្លោះប្រកែកគ្នាដើម្បីបង្កើតការគ្រប់គ្រងនៅក្នុងជុំរុំ ជុំវិញការជួញដូរគ្រឿងញៀនខុសច្បាប់។ មន្ត្រីប្រទេសបង់ក្លាដែសបាននិយាយថា ក្រុមជនជាតិរ៉ូហ៊ីងយ៉ាមួយចំនួនជាប់ពាក់ព័ន្ធក្នុងឧក្រិដ្ឋកម្មធ្ងន់ធ្ងរដូចជាការចាប់ជំរិត និងស្វែងរកប្រាក់លោះជាដើម ហើយពួកគេប្រើជុំរុំនេះដើម្បីរត់ពន្ធគ្រឿងញៀនពីសហភាពមីយ៉ាន់ម៉ា ជាកន្លែងដែលពួកគេរស់នៅមុនពេលមកដល់ប្រទេសបង់ក្លាដែស។ អំពើហិង្សាកាលពីថ្ងៃសុក្របានកើតឡើងប្រហែល ៣សប្តាហ៍បន្ទាប់ពីតំណាងអន្តរជាតិសម្រាប់ជនភៀសខ្លួនរ៉ូហ៊ីងយ៉ា ត្រូវបានគេបាញ់សម្លាប់នៅក្នុងជុំរុំនៅក្នុងស្រុក Ukhiya ដូចគ្នានេះ។

ជនជាតិរ៉ូហ៊ីងយ៉ាជាង ៧០០.០០០នាក់បានភៀសខ្លួនទៅជុំរុំជនភៀសខ្លួននៅប្រទេសបង់ក្លាដែស ចាប់តាំងពីខែសីហា ឆ្នាំ២០១៧ ខណៈដែលយោធានៅសហភាពមីយ៉ាន់ម៉ាដែលភាគច្រើនកាន់សាសនាព្រះពុទ្ធ បានចាប់ផ្តើមការបង្ក្រាបយ៉ាងឃោរឃៅទៅលើក្រុមជនជាតិភាគតិចមូស្លីម បន្ទាប់ពីការវាយប្រហារដោយក្រុមបះបោរ។ ជាសរុបប្រទេសបង់ក្លាដែសបាននឹងកំពុងផ្តល់ទីជម្រកដល់ជនភៀសខ្លួនរ៉ូហ៊ីងយ៉ាជាង ១.១លាននាក់ពីសហភាពមីយ៉ាន់ម៉ា បន្ទាប់ពីរលកនៃការធ្វើទុក្ខបុកម្នេញកន្លងមក៕

អត្ថបទ៖ ប៊ុនថន