អាហ្វហ្គានីស្ថាន៖ ក្រុមតាលីបង់កំពុងបណ្ដុះបណ្ដាលកងកម្លាំងនគរបាលព្រំដែន ដើម្បីគ្រប់គ្រងការឆ្លងកាត់ព្រំដែននៅទូទាំងប្រទេសអាហ្វហ្គានីស្ថាន រយៈពេលប៉ុន្មានខែបន្ទាប់ពីការកាន់កាប់ប្រទេសនេះកាលពីពាក់កណ្តាលខែសីហា។ កងពលតូចនគរបាលព្រំដែនទី៤៤ នៅទីក្រុង Helmand ដែលត្រូវបានបង្កើតឡើងដោយអតីតរដ្ឋាភិបាលអាហ្វហ្គានីស្ថាន ពេលនេះត្រូវបានប្រើប្រាស់ដោយក្រុមតាលីបង់ដើម្បីបណ្តុះបណ្តាលកងកម្លាំងនគរបាលព្រំដែនរបស់ពួកគេ។
នគរបាលព្រំដែនក្រុមតាលីបង់ ៥០នាក់ដំបូងបានបញ្ចប់វគ្គ បន្ទាប់ពីការបណ្តុះបណ្តាលរយៈពេល ៣សប្តាហ៍។ មន្ត្រីតាលីបង់បាននិយាយថា ការផ្តោតសំខាន់នៃការហ្វឹកហ្វឺននេះគឺដើម្បីរៀបចំកងកម្លាំងរបស់ពួកគេ ក្នុងការបំពេញតួនាទីរក្សាច្បាប់ និងសណ្តាប់ធ្នាប់។ ក្រុមហ្វឹកហាត់បានប្រើប្រាស់ផ្លូវឆ្លងកាត់តំបន់ Dishu ដែលជាប់ព្រំដែនប្រទេសប៉ាគីស្ថានដើម្បីចូលមកប្រទេសអាហ្វហ្គានីស្ថាន និងបើកការវាយប្រហារទៅលើកងទ័ពសហរដ្ឋអាមេរិក និងកងកម្លាំងសន្តិសុខប្រទេសអាហ្វហ្គានីស្ថានដែលគាំទ្រដោយប្រទេសលោកខាងលិច។ បច្ចុប្បន្ននេះពួកគេកំពុងត្រូវបានបណ្តុះបណ្តាល ដើម្បីការពារ ព្រំដែន ដូចគ្នានេះដែលពួកគេធ្លាប់បានចូលមកប្រទេសនិងប្រយុទ្ធ។ លោក Shaikh Ahmadullah ប្រធានជ្រើសរើសក្រុមតាលីបង់នៅភាគខាងត្បូងអាហ្វហ្គានីស្ថាននិយាយថា កងកម្លាំងរបស់ក្រុមនេះមានសមត្ថភាពការពារព្រំដែនរបស់ប្រទេស។ ប៉ុន្តែបញ្ហាប្រឈមចម្បងមួយរបស់កងកម្លាំងដែលទើបទទួលបានការហ្វឹកហ្វឺនថ្មីនេះ នឹងត្រូវរារាំងចលនាអ្នកប្រយុទ្ធរដ្ឋអ៊ីស្លាមណាមួយនៅតាមខ្សែបន្ទាត់ព្រំដែនតំបន់ Durand៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
