ក្រុមហ៊ុនបណ្តាញផ្សព្វផ្សាយសង្គម បានអះអាងនៅថ្ងៃអង្គារនេះថា សំណើរបស់ប្រទេសអូស្ត្រាលី ក្នុងការហាមប្រាមកុមារអាយុក្រោម១៦ឆ្នាំ ពីវេទិកាបណ្តាញផ្សព្វផ្សាយសង្គម គឺ «ប្រញាប់ប្រញាល់ពេក» ដោយបង្ហាញពី «ការព្រួយបារម្ភខ្លាំង» អំពីផលវិបាកដែលអាចកើតមានដោយអចេតនា។

ច្បាប់ដ៏សំខាន់នេះ នឹងបង្ខំឱ្យក្រុមហ៊ុនបណ្តាញផ្សព្វផ្សាយសង្គម រារាំងកុមារមិនឱ្យចូលប្រើប្រាស់វេទិការបស់ពួកគេ បើមិនដូច្នេះទេត្រូវប្រឈមការផាកពិន័យរហូតដល់៥០លានដុល្លារអូស្ត្រាលី ឬ(៣២,៥ លាន ដុល្លារអាមេរិក) ។

វេទិកាដូចជាបណ្តាញ X, Snapchat, TikTok, និងបណ្តាញសង្គម Meta បានរិះគន់ពេលវេលា២៤ ម៉ោង ដែលត្រូវបានផ្តល់ឱ្យ សម្រាប់មតិយោបល់ពីភាគីពាក់ព័ន្ធ ដោយអះអាងពីកង្វះការពិគ្រោះយោបល់ និងព័ត៌មានលម្អិតមិនគ្រប់គ្រាន់ អំពីរបៀបដែលច្បាប់នឹងដំណើរការ។

ក្រុមហ៊ុនបណ្តាញ X បាននិយាយនៅក្នុងការដាក់ស្នើរបស់ខ្លួនថា ក្រុមហ៊ុនមាន «ក្តីបារម្ភយ៉ាងខ្លាំង» ថា បម្រាមនេះ នឹងមាន «ផលប៉ះពាល់អវិជ្ជមាន» លើកុមារ ហើយវាបានរំលោភលើ «សេរីភាពក្នុងការបញ្ចេញមតិ និងសិទ្ធិទទួលបានព័ត៌មាន» របស់កុមារ។

ប្រទេសអូស្ត្រាលី ស្ថិតក្នុងចំណោមប្រទេសដែលការពារ និងព្យាយាមដើម្បីសម្អាតបញ្ហាលើបណ្តាញផ្សព្វផ្សាយសង្គម ហើយការកំណត់អាយុដែលបានស្នើឡើង នឹងស្ថិតក្នុងចំណោមវិធានការតឹងរ៉ឹងបំផុតរបស់ពិភពលោក ដែលមានគោលដៅលើកុមារ។