ទីភ្នាក់ងារសារព័ត៌មាន Bloomberg បានរាយការណ៍ដោយដកស្រង់ប្រភពថា ចក្រភពអង់គ្លេស បានបញ្ជូនមីស៊ីល Storm Shadow រាប់សិបគ្រាប់ ទៅកាន់ប្រទេសអ៊ុយក្រែន កាលពីប៉ុន្មានសប្តាហ៍មុនជាលើកដំបូង ក្នុងអំឡុងពេលកាន់តំណែងរបស់លោកនាយករដ្ឋមន្ត្រី Keir Starmer។

យោងតាមទីភ្នាក់ងារសារព័ត៌មាននេះ ការបញ្ជូនមីស៊ីលទាំងនេះ មិនត្រូវបានប្រកាសជាសាធារណៈ រួមជាមួយនឹងព័ត៌មានអំពីចំនួនពិតប្រាកដនៃមីស៊ីល និងកាលបរិច្ឆេទនៃការមកដល់របស់ពួកវា នៅក្នុងប្រទេសអ៊ុយក្រែន។ ក្នុងពេលជាមួយគ្នានេះ សារព័ត៌មាន Bloomberg បានចង្អុលបង្ហាញថា មីស៊ីលទាំងនោះ ត្រូវបានបញ្ជូន មុនការអនុញ្ញាតរបស់សហរដ្ឋអាមេរិក និងចក្រភពអង់គ្លេស ឲ្យប្រើប្រាស់អាវុធកំណត់គោលដៅជាក់លាក់រយៈចម្ងាយឆ្ងាយ ដើម្បីចាប់ផ្តើមការវាយប្រហារពីទឹកដីអ៊ុយក្រែន ចូលជ្រៅទៅក្នុងប្រទេសរុស្ស៊ី។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃទី ២១ ខែវិច្ឆិកាថា សហរដ្ឋអាមេរិក និងសម្ព័ន្ធមិត្តណាតូ បានប្រកាសមុននេះថា នឹងអនុញ្ញាតឲ្យអ៊ុយក្រែន ប្រើប្រាស់អាវុធរយៈចម្ងាយឆ្ងាយ វាយប្រហារ ក្នុងប្រទេសរុស្ស៊ី បន្ទាប់ពីនោះ មីស៊ីលអាមេរិក និងអង់គ្លេស បានវាយប្រហារទីតាំងយោធារុស្ស៊ីនៅតំបន់ Kursk និង Bryansk។

លោក ពូទីន បាននិយាយថា ប្រទេសរុស្ស៊ីបានឆ្លើយតបទៅនឹងការវាយប្រហារទាំងនោះ ដោយការបាញ់មីស៊ីលបាលីស្ទីក រយៈចម្ងាយមធ្យមលឿនជាងសំឡេង Oreshnik ថ្មីបំផុតរបស់រុស្ស៊ីជាមួយនឹងក្បាលគ្រាប់ដែលមិនមែនជានុយក្លេអ៊ែរ ទៅលើរោងចក្រឧស្សាហកម្មការពារជាតិអ៊ុយក្រែន Yuzhmash នៅក្នុងទីក្រុង Dnepr (អតីត Dnepropetrovsk) ។ មេដឹកនាំរុស្ស៊ីរូបនេះ បានសង្កត់ធ្ងន់ថា គោលនយោបាយបង្កហេតុរបស់ប្រទេសលោកខាងលិច អាចមានផលវិបាកធ្ងន់ធ្ងរ ប្រសិនបើពួកគេបង្កើនជម្លោះ កាន់តែខ្លាំងនោះ។