អ្នកនាំពាក្យវិមានក្រឹមឡាំងលោក Dmitry Peskovបាននិយាយនៅថ្ងៃអង្គារនេះថា កិច្ចពិភាក្សានៅលោកខាងលិច ស្តីពីការផ្តល់អាវុធនុយក្លេអ៊ែរដល់ប្រទេសអ៊ុយក្រែន គឺជារឿងគ្មានទំនួលខុសត្រូវទាល់តែសោះ ។

កាសែត New York Times បានរាយការណ៍កាលពីសប្តាហ៍មុនថា ក្រុមមន្រ្តីលោកខាងលិចគ្មានអត្តសញ្ញាណមួយចំនួន បានលើកឡើងថា ប្រធានាធិបតីសហរដ្ឋអាមេរិកលោក Joe Biden គួរតែផ្តល់អាវុធនុយក្លេអ៊ែរដល់អ៊ុយក្រែន បើទោះបីជាមានក្តីកង្វល់ថា ជំហានបែបនេះ នឹងធ្វើឲ្យមានភាពស្មុគស្មាញកាន់តែធ្ងន់ធ្ងរឡើងក៏ដោយ ។

លោក Peskov និយាយថា សេចក្តីអត្ថាធិប្បាយបែបនេះ គ្រាន់តែជាប្រភពអនាមិកប៉ុណ្ណោះ ហើយវាគឺជារឿងគ្មានទំនួលខុសត្រូវទាល់តែសោះ ។

នៅមុននេះ មន្រ្តីសន្តិសុខរុស្ស៊ីលោក Dmitry Medvedev និយាយថា បើសិនជាលោកខាងលិចផ្តល់អាវុធនុយក្លេអ៊ែរដល់អ៊ុយក្រែន ដល់ពេលនោះ ទីក្រុងម៉ូស្គូអាចនឹងពិចារណាលើការផ្ទេរដូចគ្នា ដើម្បីផ្តល់ជាមូលដ្ឋានសម្រាប់ឆ្លើយតបនុយក្លេអ៊ែរ ។

លោក Medvedev និយាយទៀតថា វឌ្ឍនភាពនៃប្រតិបត្តិការយោធាពិសេស បានបង្ហាញថា មធ្យោបាយសង្គ្រាម យុទ្ធសាស្រ្តសង្គ្រាម បានផ្លាស់ប្តូរយ៉ាងខ្លាំង បន្ទាប់ពីការលេចឡើងនៃប្រភេទអាវុធថ្មីៗ ៕