បេសកកម្មរបស់អង្គការសហប្រជាជាតិ (UN) ប្រចាំនៅប្រទេសអាហ្វហ្គានីស្ថាន នៅថ្ងៃអង្គារ (ទី២៦ ខែវិច្ឆិកា) នេះ បាននិយាយថា ក្រុមដែលកំពុងកាន់អំណាច គឺតាលីបង់ បានចាប់ឃុំខ្លួនអ្នកសារព័ត៌មានដោយឥតហេតុផលចំនួន ២៥៦លើក គិតចាប់តាំងពីការឡើងគ្រប់គ្រងប្រទេសរបស់ក្រុមនេះ កាលពី ៣ឆ្នាំមុន ហើយបានជំរុញឲ្យអាជ្ញាធរនៅទីនោះការពារប្រព័ន្ធផ្សព្វផ្សាយ។

នៅក្នុងការឆ្លើយតបដែលភ្ជាប់ជាមួយនឹងរបាយការណ៍ ក្រសួងការបរទេសដឹកនាំដោយក្រុមតាលីបង់ បានបដិសេធថា មិនមានការចាប់ខ្លួនអ្នកសារព័ត៌មាន ក្នុងចំនួននោះឡើយ ហើយបន្ថែមថា អ្នកដែលត្រូវបានចាប់ខ្លួនមិនបានប្រព្រឹត្តបទល្មើសព្រហ្មទណ្ឌទេ។

នៅក្នុងសេចក្តីថ្លែងការណ៍មួយ បេសកកម្មរបស់ UN (UNAMA) និងការិយាល័យសិទ្ធិមនុស្សរបស់ UN បានឲ្យដឹងថា អ្នកសារព័ត៌មាននៅក្នុងអាហ្វហ្គានីស្ថាន បានធ្វើការក្រោម «លក្ខខណ្ឌដ៏លំបាក»។ លោកស្រី Roza Otunbayeva តំណាងពិសេសរបស់អគ្គលេខាធិការ UN លោក Antonio Guterres បាននិយាយថា៖ «ជារឿយៗ ពួកគេប្រឈមនឹងច្បាប់មិនច្បាស់លាស់ ជុំវិញអ្វីដែលពួកគេអាច និងមិនអាចរាយការណ៍បាន ដោយបង្កើតឲ្យមានហានិភ័យពីការរងនូវការបំភិតបំភ័យ និងការឃុំខ្លួនឥតហេតុផល ប្រសិនបើត្រូវបានចាត់ទុកថា ជាការរិះគន់»។

អ្នកស្រីបានបន្ថែមថា៖ «យើងជំរុញឲ្យអាជ្ញាធរជាក់ស្តែងធានាសុវត្ថិភាព និងសន្តិសុខរបស់អ្នកសារព័ត៌មាន និងបុគ្គលិករបស់បណ្ដាញសារព័ត៌មានទាំងអស់ នៅពេលពួកគេបំពេញភារកិច្ចរបស់ខ្លួន ហើយទទួលស្គាល់យ៉ាងពេញលេញនូវសារៈសំខាន់របស់ស្ត្រីដែលធ្វើការនៅក្នុងប្រព័ន្ធផ្សព្វផ្សាយ»។

ជាការឆ្លើយតប ក្រសួងបានឲ្យដឹងថា ស្ត្រីបានបន្តធ្វើការនៅក្នុងបណ្ដាញសារព័ត៌មាន ដោយស្ថិតនៅក្រោមលក្ខខណ្ឌមួយចំនួន ដើម្បីបំពេញតាមគោលការណ៍សីលធម៌ខាងសាសនា ដូចជាបិទមុខ និងធ្វើការដាច់ដោយឡែកពីបុរស៕