ក្រុមមន្ត្រីមកពីប្រទេសម៉ិកស៊ិក កាណាដា និងចិន រួមទាំងក្រុមឧស្សាហកម្មធំៗបានព្រមានថា ការគំរាមកំហែងរបស់ប្រធានាធិបតីជាប់ឆ្នោត លោក Donald Trump របស់សហរដ្ឋអាមេរិក ចំពោះការដំឡើងពន្ធលើទំនិញ នឹងធ្វើឱ្យប៉ះពាល់ដល់សេដ្ឋកិច្ចរបស់គ្រប់ភាគីពាក់ព័ន្ធទាំងអស់ បង្កើនអតិផរណា និងបំផ្លាញទីផ្សារការងារ។

ការសន្យាបន្ថែមពន្ធ ២៥% លើកាណាដា និងម៉ិកស៊ិក របស់លោក Trump ដែលបានប្រកាសកាលពីថ្ងៃចន្ទ ធ្វើឱ្យទីផ្សាររូបិយប័ណ្ណ មូលបត្របំណុល និងភាគហ៊ុនច្របូកច្របល់នៅថ្ងៃអង្គារ ដោយសារប្រទេសទាំងបីគឺជាដៃគូពាណិជ្ជកម្មដ៏ធំបំផុតរបស់អាមេរិក។ ម៉ិកស៊ិក និងកាណាដា មានទំនាក់ទំនងជាពិសេសនៅក្នុងការផលិតរថយន្ត និងថាមពលរបស់អាមេរិក ដោយសារកិច្ចព្រមព្រៀងពាណិជ្ជកម្មជាច្រើនទសវត្សរ៍រវាងប្រទេសជិតខាងនៅអាមេរិកខាងជើងទាំងនេះ។

បណ្ដាមេដឹកនាំ និងមន្ត្រីជាន់ខ្ពស់ផ្សេងទៀតព្រមានថា សង្គ្រាមពាណិជ្ជកម្មអាចផ្ទុះឡើង ហើយសេដ្ឋកិច្ចត្រូវបានខូចខាត ខណៈស្វះស្វែងរកការពិភាក្សាជាមួយលោក Trump បន្ទាប់ពីការប្រកាសគួរឱ្យភ្ញាក់ផ្អើល ដែលរួមបញ្ចូលទាំងការយកពន្ធបន្ថែម ១០% លើទំនិញចិន រហូតដល់ប្រទេសទាំងបីទប់ស្កាត់លំហូរនៃគ្រឿងញៀនខុសច្បាប់ និងការឆ្លងកាត់ព្រំដែនពីជនអន្តោប្រវេសន៍។

អ្នកសេដ្ឋកិច្ចកសិកម្ម និងនាយកប្រតិបត្តិឧស្សាហកម្មសង្កត់ធ្ងន់ថា ប្រសិនបើលោក Trump អនុវត្តតាមផែនការពន្ធនេះមែន អ្នកប្រើប្រាស់នៅអាមេរិក អាចប្រឈមនឹងតម្លៃខ្ពស់គ្រប់បែបយ៉ាង រាប់ចាប់ពីផ្លែឈើ និងផលិតផលស្រស់ផ្សេងទៀត ព្រមទាំងសាច់សត្វផងដែរ៕