កូឡុំប៊ី៖ ប្រទេសកូឡុំប៊ីមានករណីឆ្លងជំងឺ COVID-19 ជាង ១លាននាក់កាលពីចុងសប្ដាហ៍មុន ហើយបានក្លាយជាប្រទេសទី៣ នៅអាមេរិកឡាទីនដែលមានអ្នកឆ្លងខ្ពស់ជាងគេបំផុត ចាប់តាំងពីជំងឺរាតត្បាតសកលបានផ្ទុះឡើង។ ប្រទេសប្រេស៊ីលមានករណីឆ្លងជំងឺនេះជាង ១លាននាក់កាលពីខែមិថុនា ហើយអាហ្សង់ទីនបានឆ្លងជំងឺនេះជាង ១លានករណីកាលពីថ្ងៃច័ន្ទ។ ប្រទេសប៉េរូ និងម៉ិចស៊ិកូត្រូវបានគេរំពឹងថា នឹងឈានដល់ចំណុចកំពូលនៅថ្ងៃខាងមុខ។
ជារួមអាមេរិកឡាទីនមានករណីឆ្លងជំងឺនេះជាង ១០លាន ៩សែននាក់ និងជាង ៣៩៣.០០០នាក់បានស្លាប់គិតត្រឹមថ្ងៃច័ន្ទសប្ដាហ៍នេះ នេះបើយោងតាមទិន្នន័យពីសាកលវិទ្យាល័យចនហ៊បគីនស៍។ ក្រុមអាជ្ញាធរសុខាភិបាលកូឡុំប៊ីបាននិយាយថា ប្រទេសនេះបានរាយការណ៍ពីការឆ្លងជំងឺនេះចំនួន ១.០២៥.០៥២នាក់ចាប់តាំងពីករណីឆ្លងដំបូងត្រូវបានរកឃើញកាលពីថ្ងៃទី៦ ខែមីនា ហើយការស្លាប់បានកើនឡើងដល់ ៣០,៣៤៨នាក់។ ខណៈដែលមានអ្នកឆ្លងចំនួន ៥,៤៤០,៩០៣នាក់ ប្រទេសប្រេស៊ីលជាប់ចំណាត់ថ្នាក់ទី៣ នៅលើពិភពលោកដែលមានចំនួនអ្នកឆ្លងខ្ពស់ជាងគេបំផុត។ វាមានអ្នកស្លាប់ចំនួន ១៥៧,៩៨១នាក់។
យោងតាមទិន្នន័យជាផ្លូវការបានឱ្យដឹងថា នៅប្រទេសវេណេហ្ស៊ុយអេឡាមានករណីឆ្លងជំងឺ COVID-19 ជាង ៩ម៉ឺនករណី និងស្លាប់ ៧៨០នាក់។ វីរុសនេះត្រូវបានគេសង្ស័យថា បានសម្លាប់មនុស្សប្រហែល ៨៩.០០០នាក់នៅក្នុងប្រទេសម៉ិកស៊ិក។ ម៉ិកស៊ិកមានចំនួនអ្នកស្លាប់ខ្ពស់ជាងបំផុតលំដាប់ទី៤ នៅលើពិភពលោកបន្ទាប់ពីសហរដ្ឋអាមេរិក ប្រេស៊ីល និងឥណ្ឌា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
