តំណាងអចិន្ត្រៃយ៍របស់រុស្ស៊ីប្រចាំនៅអង្គការសហប្រជាជាតិ លោក Vasily Nebenzya បាននិយាយថា បុគ្គលិកមនុស្សធម៌ជាង ៣០០នាក់ ដែលភាគច្រើនជាបុគ្គលិករបស់អង្គការសហប្រជាជាតិ ត្រូវបានសម្លាប់ នៅក្នុងតំបន់ហ្កាហ្សាស្ទ្រីប ក្នុងឆ្នាំ ២០២៣។

លោកបានប្រាប់កិច្ចប្រជុំក្រុមប្រឹក្សាសន្តិសុខUN ស្តីពីការការពារជនស៊ីវិល និងបុគ្គលិកមនុស្សធម៌ នៅក្នុងតំបន់ជម្លោះថា៖ «បញ្ហានៃការការពារបុគ្គលិកមនុស្សធម៌ គឺកាន់តែតានតឹងជាងពេលមុនៗទៅទៀត។ យើងបានបំបែកកំណត់ត្រាដ៏អាក្រក់មួយទៀតកាលពីឆ្នាំមុន នៅតំបន់ហ្កាហ្សាស្ទ្រីប ដែលមានបុគ្គលិកមនុស្សធម៌ជាង ៣០០នាក់ ត្រូវបានកត់ត្រាថា បានស្លាប់ ដែលភាគច្រើនជាបុគ្គលិកUN  ហើយភាគច្រើន ជាបុគ្គលិករបស់អង្គការUNRWA»។ 

បេសកជនរុស្ស៊ីរូបនេះ បានបន្តថា៖ «នៅពេលប្រឈមមុខនឹងការប្រយុទ្ធគ្នាដ៏ខ្លាំងក្លា យើងមិនត្រូវខំប្រឹងប្រែងទប់ស្កាត់ការវាយប្រហារ និងអំពើហិង្សាលើមនុស្សក្លាហានទាំងនេះឡើយ»។ «ទោះជាយ៉ាងណាក៏ដោយ មានវិធីតែមួយគត់ ដើម្បីដោះស្រាយបញ្ហានេះ គឺតាមរយៈបទឈប់បាញ់ភ្លាមៗ និងដំណោះស្រាយនយោបាយ-ការទូត។ យើងបានអំពាវនាវម្តងហើយម្តងទៀតឲ្យធ្វើរឿងនេះ និងជំរុញឲ្យសមាជិកក្រុមប្រឹក្សា នៅក្នុងកិច្ចប្រជុំនេះ ចាត់វិធានការ។ សហព័ន្ធរុស្ស៊ី បានគាំទ្រយ៉ាងខ្ជាប់ខ្ជួននូវវិធានការទាំងអស់ដែលមានគោលបំណង ក្នុងការធានាសុវត្ថិភាពរបស់អ្នកធ្វើការងារមនុស្សធម៌ និងបុគ្គលិកអង្គការសហប្រជាជាតិ»។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ានៅថ្ងៃទី ០៧ ខែតុលា ឆ្នាំ ២០២៣ នៅពេលដែលក្រុមយុទ្ធជនមកពីចលនាបដិវត្តន៍ប៉ាឡេស្ទីនហាម៉ាសដែលមានមូលដ្ឋាននៅតំបន់ហ្កាហ្សាស្ទ្រីប បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែលពីតំបន់ហ្កាហ្សា ដោយបានសម្លាប់អ្នកស្រុករស់នៅតាមព្រំដែនអ៊ីស្រាអែល និងចាប់ពង្រត់ជនជាតិអ៊ីស្រាអែលរាប់រយនាក់។