បណ្ដាសមាជិករបស់អង្គការសន្ធិសញ្ញាអាត្លង់ទិកខាងជើង ឬអង្គកាណាតូ (NATO) កាលពីថ្ងៃអង្គារ (ទី២៦ ខែវិច្ឆិកា) បានអះអាងជាថ្មីនូវការគាំទ្ររបស់ពួកគេ ចំពោះអ៊ុយក្រែន អំឡុងកិច្ចពិភាក្សាជាមួយមន្ត្រីរបស់ប្រទេសនេះ ដែលធ្វើឡើងដើម្បីជាការឆ្លើយតបទៅនឹងការបាញ់មីស៊ីលបាលីស្ទិករយៈចម្ងាយមធ្យមសាកល្បងរបស់រុស្ស៊ី កាលពីសប្តាហ៍មុន។

ឯកអគ្គរដ្ឋទូតតំណាងឲ្យសមាជិកចំនួន ៣២ប្រទេសរបស់អង្គការណាតូ ត្រូវបានរៀបរាប់ប្រាប់ដោយមន្ត្រីជាន់ខ្ពស់អ៊ុយក្រែន បន្ទាប់ពីទីក្រុងគីវ បានអំពាវនាវឲ្យមានកិច្ចប្រជុំនៃក្រុមប្រឹក្សាអង្គកាណាតូ-អ៊ុយក្រែន ដែលជាវេទិកាសម្រាប់កិច្ចសហប្រតិបត្តិការ។

លោកស្រី Nataliia Galibarenko ឯកអគ្គរដ្ឋទូតអ៊ុយក្រែនប្រចាំអង្គការណាតូ បានលើកឡើងនៅក្នុងសេចក្តីថ្លែងការណ៍មួយថា៖ «ប្រមុខផ្នែកស៊ើបការណ៍ការពារជាតិអ៊ុយក្រែន និងជាមេបញ្ជាការស្តីទីនៃកងទ័ពអាកាស បានចូលរួមកិច្ចប្រជុំតាមប្រព័ន្ធអ៊ីនធឺណេត និងបានរៀបរាប់ប្រាប់សម្ព័ន្ធមិត្ត អំពីព័ត៌មានលម្អិតនៃការវាយប្រហារ និងផលវិបាកដែលអាចកើតមាន»។

គួរបញ្ជាក់ថា ប្រធានាធិបតីរុស្ស៊ី លោក Vladimir Putin កាលពីថ្ងៃទី២១ ខែវិច្ឆិកា បាននិយាយថា ទីក្រុងមូស្គូបានវាយប្រហារទីតាំងយោធាអ៊ុយក្រែន ដោយប្រើប្រាស់មីស៊ីលបាលីស្ទិកលឿនជាងសំឡេងកម្រិតមធ្យមថ្មី ដើម្បីជាការឆ្លើយតបទៅនឹងសហរដ្ឋអាមេរិក និងចក្រភពអង់គ្លេសដែលអនុញ្ញាតឲ្យទីក្រុងគីវវាយប្រហារដែនដីរុស្ស៊ីដោយប្រើអាវុធកម្រិតខ្ពស់របស់លោកខាងលិច។

នៅក្នុងសេចក្តីថ្លែងការណ៍មួយបន្ទាប់ពីមាននូវកិច្ចពិភាក្សានោះ អង្គការណាតូបានឲ្យដឹងថា៖ «ការវាយប្រហារដែលបានកំណត់គោលដៅលើទីក្រុង Dnipro ត្រូវបានគេមើលឃើញថា ជាការប៉ុនប៉ងមួយផ្សេងទៀតរបស់រុស្ស៊ី ដើម្បីធ្វើអំពើភេរវកម្មលើប្រជាជនស៊ីវិល ក្នុងប្រទេសអ៊ុយក្រែន និងបំភិតបំភ័យអ្នកដែលគាំទ្រអ៊ុយក្រែន ខណៈដែលប្រទេសនេះការពារខ្លួនប្រឆាំងនឹងការលុកលុយខុសច្បាប់ និងមិនមានហេតុផលរបស់រុស្ស៊ី»៕