ប្រភពផ្លូវការបានឲ្យដឹងថា កាលពីថ្ងៃអង្គារម្សិលមិញ យន្តហោះយោធាហ្សកដានី បានទម្លាក់ជំនួយពីលើអាកាសដល់តំបន់ភាគខាងជើងហ្កាហ្សាជាលើកដំបូងក្នុងរយៈពេល ៥ខែកន្លងមកនេះ នៅក្នុងកិច្ចខិតខំមួយ ដើម្បីបន្ធូរបន្ថយស្ថានភាពមនុស្សធម៌នៅដែនដីបិទច្រកមួយនេះ ។

ប្រភពព័ត៌មានបាននិយាយប្រាប់ទីភ្នាក់ងារព័ត៌មានរ៉យទ័រថា យន្តហោះ C-130 ចំនួន ២គ្រឿងរបស់កងកម្លាំងអាកាសហ្សកដានី បានទម្លាក់ជំនួយដែលមានស្បៀងអាហារទម្ងន់ជិត ៧តោន និងសម្ភារៈចាំបាច់ជាច្រើនទៀតដល់តំបន់ដែលទីភ្នាក់ងារអង្គការសហប្រជាជាតិ(UN)ចាត់ទុកថាជាតំបន់ត្រូវការខ្លាំងបំផុត និងប្រឈមនឹងភាពស្រេកឃ្លានខ្លាំងជាងគេ ។

ក្រសួងសុខាភិបាលហ្កាហ្សា និយាយនៅក្នុងសេចក្តីថ្លែងការណ៍កាលពីថ្ងៃអង្គារថា ជនប៉ាឡេស្ទីនជាង ៤៤.២៤៩នាក់ ត្រូវបានសម្លាប់ និងមនុស្ស ១០៤.៧៤៦នាក់ផ្សេងទៀត បានរងរបួស ដោយសារការវាយប្រហាររបស់យោធាអ៊ីស្រាអែលលើតំបន់ហ្កាហ្សា ចាប់តាំងពីថ្ងៃទី ៧ ខែតុលា ឆ្នាំ ២០២៣ ។

សង្រ្គាមនេះ បានផ្ទុះឡើង ជាការឆ្លើយតបនឹងការវាយប្រហារឆ្លងព្រំដែនរបស់ក្រុមជីវពលដឹកនំាដោយក្រុមហាម៉ាស់ កាលពីថ្ងៃទី ៧ ខែតុលា ឆ្នាំ ២០២៣ ពេលដែលក្រុមខ្មាន់កាំភ្លើង បានសម្លាប់មនុស្សប្រហែល ១.២០០នាក់ និងចាប់ចំណាប់ថ្នូរជាង ២៥០នាក់ ត្រឡប់ទៅកាន់តំបន់ហ្កាហ្សា ៕