ការស្ទង់មតិបង្ហាញថា ប្រជាជនកូរ៉េខាងត្បូង នៅតែប្រឆាំងយ៉ាងទូលំទូលាយ ចំពោះការផ្គត់ផ្គង់អាវុធដោយផ្ទាល់ដល់ប្រទេសអ៊ុយក្រែន ទោះបីជាមានការស្នើសុំជាអន្តរជាតិជាថ្មីពីទីក្រុងគីវ និងពីបណ្ដារដ្ឋធានីសម្ព័ន្ធមិត្ត បន្ទាប់ពីកងទ័ពកូរ៉េខាងជើងត្រូវបានរាយការណ៍ថា កំពុងជួយដល់រុស្ស៊ីក៏ដោយ។

អ៊ុយក្រែនបានស្នើសុំឲ្យទីក្រុងសេអ៊ូលនូវអាវុធជាច្រើនប្រភេទ ហើយទីក្រុងសេអ៊ូល បាននិយាយថា ខ្លួនអាចពិចារណាលើជំនួយបែបនេះ អាស្រ័យលើជំហានរបស់រុស្ស៊ី និងកូរ៉េខាងជើង នាពេលអនាគត។

គណៈប្រតិភូអ៊ុយក្រែន ដែលមានរួមទាំងរដ្ឋមន្ត្រីការពារជាតិ លោក Rustem Umerov បានគ្រោងជួបជាមួយប្រធានាធិបតីកូរ៉េខាងត្បូង លោក Yook Suk Yeol នៅព្រឹកថ្ងៃពុធ ចំពេលមានសេចក្តីរាយការណ៍ថា ដំណើរទស្សនកិច្ចរបស់ពួកគេ ក្នុងគោលបំណងស្វែងរកការគាំទ្រផ្នែកសព្វាវុធ។

តែយ៉ាងណាក៏ដោយ មន្ត្រីនៅការិយាល័យប្រធានាធិបតីកូរ៉េខាងត្បូង និងក្រសួងការបរទេស បានបដិសេធមិនបញ្ជាក់ពីរបាយការណ៍នេះទៅកាន់សារព័ត៌មាន Reuters នោះទេ។

នៅខាងក្រៅការិយាល័យរបស់ Yoon ក្នុងរដ្ឋធានីសេអ៊ូល បដាដែលកាន់ដោយបាតុករមួយក្រុមតូច បានសរសេរថា៖ «ទេ! មិនគាំទ្ររដ្ឋាភិបាលកូរ៉េខាងត្បូងដែលមានគម្រោងផ្គត់ផ្គង់អាវុធដល់អ៊ុយក្រែន»។

គួរបញ្ជាក់ថា នៅក្នុងបទសម្ភាសន៍កាលពីខែតុលាជាមួយទូរទស្សន៍កូរ៉េខាងត្បូង KBS ប្រធានាធិបតីអ៊ុយក្រែន លោក Volodymyr Zelenskiy បាននិយាយថា ទីក្រុងគីវ នឹងផ្ញើសំណើលម្អិតមួយទៅកាន់ទីក្រុងសេអ៊ូល ដើម្បីសុំគាំទ្រផ្នែកអាវុធ ក្នុងនោះរួមទាំងកាំភ្លើងធំ និងប្រព័ន្ធការពារដែនអាកាសផងដែរ៕