ប្រជាពលរដ្ឋរស់នៅក្នុងរដ្ឋធានី Sanaa របស់យេម៉ែន បានបង្ហាញសុទិដ្ឋិនិយមរបស់ពួកគេចំពោះកិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហេសបូឡានៅប្រទេសលីបង់ ដែលបានចូលជាធរមាននៅព្រឹកថ្ងៃពុធនេះ ។

លោក Adnan al-Qarmani គឺជាពលរដ្ឋមួយរូបរស់នៅក្នុងទីក្រុង Sanaa និយាយថា ការបញ្ឈប់សង្រ្គាមនៅលីបង់ ហើយនិងប៉ាឡេស្ទីន គឺជាដំណោះស្រាយវិជ្ជមានមួយ ហើយនិងដោះស្រាយបញ្ហាបង្ហូរឈាមរបស់លីបង់ និងប៉ាឡេស្ទីន ។ កិច្ចព្រមព្រៀងនេះ មិនត្រូវរឹតត្បិត និងមិនត្រូវបំពាននោះទេ ។

លោក Sami al-Zaidi គឺជាអ្នកស្រុកម្នាក់ផ្សេងទៀត និយាយថា ពួកយើងសង្ឃឹមថា បទឈប់បាញ់នេះពិតប្រាកដ និងអនុវត្តឲ្យបានខ្ជាប់ខ្ជួន ប៉ុន្តែបើសិនវាគ្រាន់តែជាពាក្យសម្តី ការពិតនឹងត្រូវលាតត្រដាង ។

ទោះបីជាយ៉ាងណាក៏ដោយ ពលរដ្ឋយេម៉ែនមួយចំនួនទៀត បានបង្ហាញមន្ទិលសង្ស័យរបស់ពួកគេចំពោះនិរន្តភាពនៃបទឈប់បាញ់ ។

អារម្មណ៍នៅក្នុងទីក្រុង Sanaa ឆ្លុះបញ្ចាំងពីផលប្រយោជន៍ក្នុងតំបន់ធំទូលាយជាងនេះរបស់យេម៉ែន ក៏ដូចជាការជាប់ពាក់ព័ន្ធរបស់ក្រុមឧទ្ទាមហ៊ូទីនៅក្នុងជម្លោះ ។

ក្រុមហ៊ូទី បានបើកការវាយប្រហាររាប់សិបលើកលើការដឹកជញ្ជូនអន្តរជាតិនៅក្នុងតំបន់សមុទ្រក្រហម ចាប់តាំងពីខែវិច្ឆិកាឆ្នាំមុនរហូតមក ជាការបង្ហាញសាមគ្គីភាពជាមួយជនប៉ាឡេស្ទីន នៅក្នុងសង្រ្គាមរវាងអ៊ីស្រាអែល និងក្រុមហាម៉ាស់ ៕