នៅថ្ងៃពុធនេះ ជនជភៀសខ្លួនរ៉ូហ៊ីងយ៉ានៅក្នុងប្រទេសបង់ក្លាដែស បានស្វាគមន៍ការសម្រេចចិត្តរបស់រដ្ឋអាជ្ញាតុលាការព្រហ្មទណ្ឌអន្តរជាតិ(ICC) ដើម្បីស្វែងរកដីកាចាប់ខ្លួនមេដឹកនាំរបបសឹកមីយ៉ាន់ម៉ាលោក Min Aung Hlaing សម្រាប់ឧក្រិដ្ឋកម្មប្រឆាំងមនុស្សជាតិ ពាក់ព័ន្ធនឹងការធ្វើទុក្ខបុកម្នេញចោទប្រកាន់លើជនជាតិរ៉ូហ៊ីងយ៉ា ដែលជាជនមូស្លីមភាគតិច ។

លោក Shahat Zia គឺជាសកម្មជនរ៉ូហ៊ីងយ៉ាមួយរូប និយាយថា ពួកយើងសូមទាមទាររកយុត្តិធម៌ ។ បើសិនជាយុត្តិធម៌ទទួលបាន ដល់ពេលនោះពួកយើងនឹងអាចវិលត្រឡប់ទៅផ្ទះវិញបាន ។ វាមានរយៈពេល ៨ឆ្នាំមកហើយ ចាប់តាំងពីពួកយើងរងការឈឺចាប់ក្នុងនាមជាជនភៀសខ្លួននៅទីនេះ ។

គួរឲ្យដឹងថា ជនជាតិភាគតិចរ៉ូហ៊ីងយ៉ា ១លាននាក់ ភាគច្រើនទៅកាន់ប្រទេសជិតខាងបង់ក្លាដែស បានរត់គេចចេញពីការបង្រ្កាបយ៉ាងចាស់ដៃពីរបបសឹកមីយ៉ាន់ម៉ា កាលពីខែសីហា ឆ្នាំ ២០១៧ គឺជាយុទ្ធនាការមួយដែលក្រុមអ្នកស៊ើបអង្កេតអង្គការសហប្រជាជាតិ(UN) បានចាត់ទុកថាជាគំរូនៃការបោសសម្អាតជនជាតិភាគតិច ។ បច្ចុប្បន្នភាគច្រើននៃជនភៀសខ្លួន កំពុងរស់នៅក្នុងជំរំនៅប្រទេសបង់ក្លាដែស ។

ទាហាន ក្រុមនគរបាល និងអ្នកស្រុកជាពុទ្ធសាសនិក ត្រូវបានរងចោទប្រកាន់ដោយក្រុមស៊ើបអង្កេត UNថា បានដុតកម្ទេចចោលភូមិដ្ឋានរាប់រយកន្លែអនៅរដ្ឋដាច់ស្រយាល Rakhine របស់មីយ៉ាន់ម៉ា ធ្វើទារណ្ឌកម្មអ្នកស្រុក ពេលដែលពួកគេរត់ភៀសខ្លួន ការសម្លាប់រង្គាលទ្រង់ទ្រាយធំ និងការចាប់រំលោភបូក ៕