ឯកអគ្គរដ្ឋទូតរងប្រចាំអង្គការសហប្រជាជាតិរបស់ប្រទេសរុស្ស៊ី បាននិយាយកាលពីថ្ងៃពុធ ថា ការសម្រេចចិត្តណាមួយរបស់រដ្ឋបាលដែលនឹងចូលកាន់តំណែងនៅពេលខាងមុខរបស់ប្រធានាធិបតីជាប់ឆ្នោត លោក Donald Trump ក្នុងការកាត់បន្ថយការគាំទ្រសម្រាប់ប្រទេសអ៊ុយក្រែន នឹងក្លាយជា «ការកាត់ទោសប្រហារជីវិត» សម្រាប់កងទ័ពប្រទេសអ៊ុយក្រែន ខណៈចោទប្រកាន់ទីក្រុងគីវ ពីការព្យាយាមអូសទាញបណ្តាប្រទេសសម្ព័ន្ធយោធាណាតូ ឲ្យធ្លាក់ចូលក្នុងជម្លោះដោយផ្ទាល់ ជាមួយរុស្ស៊ី ក្នុងពេលនេះ។

ថ្លែងទៅកាន់ក្រុមប្រឹក្សាសន្តិសុខអង្គការសហប្រជាជាតិ លោក Dmitry Polyanskiy បានចោទប្រកាន់រដ្ឋបាលរបស់លោក Biden ដែលនឹងចាកចេញពីតំណែង ថា បានព្យាយាមតាមរយៈការបង្កើនការគាំទ្ររបស់ខ្លួនចំពោះអ៊ុយក្រែន ដើម្បីបង្កើតភាពគ្មានសណ្តាប់ធ្នាប់ ទាំងនៅក្នុងប្រទេសរុស្ស៊ី និងជាមួយក្រុមថ្មីនៅក្នុងសេតវិមាន។

លោក Polyanskiy បាននិយាយថា ប្រធានាធិបតីអ៊ុយក្រែន លោក Volodymyr Zelenskiy មានការព្រួយបារម្ភចំពោះការវិលត្រឡប់របស់លោក Trump នៅក្នុង ខែ មករា ខាងមុខ។

ប្រភពព័ត៌មានចំនួនបី ដែលដឹងអំពីបញ្ហានេះបានប្រាប់សារព័ត៌មានរ៉យទ័រថា លោក Trump កំពុងពិចារណាលោក Keith Kellogg ជាឧត្តមសេនីយ៍ចូលនិវត្តន៍ ដែលបានបង្ហាញលោកនូវផែនការដើម្បីបញ្ចប់សង្គ្រាមនៅអ៊ុយក្រែន ក្នុងនាមជាបេសកជនពិសេសសម្រាប់ជម្លោះនេះ។