ដោយមានការចូលរួមពីនាយករដ្ឋមន្ត្រីប៉ូឡូញលោក Donald Tusk ក្រុមមេដឹកនាំនៃបណ្តាប្រទេសអឺរ៉ុបខាងជើង និងបាល់ទិក បានប្រកាសពីការបន្តនិងពង្រីកការគាំទ្ររបស់ពួកគេសម្រាប់អ៊ុយក្រែន កាលពីថ្ងៃពុធ។

ការសន្យានេះ ត្រូវបានធ្វើឡើង នៅពេលដែលនាយករដ្ឋមន្ត្រីនៃប្រទេសដាណឺម៉ាក អេស្តូនី ហ្វាំងឡង់ ន័រ វែស ប៉ូឡូញ និងស៊ុយអែត រួមជាមួយនឹងរដ្ឋមន្ត្រីការបរទេសនៃប្រទេសឡាតវី បានចាប់ផ្តើមកិច្ចប្រជុំរយៈពេលពីរថ្ងៃ នៅភូមិគ្រឹះ Harpsund ដែលជាលំនៅឋានលំហែកម្សាន្តរបស់នាយករដ្ឋមន្ត្រីស៊ុយអែត។ លោក Tusk បានចូលរួមក្នុងកិច្ចប្រជុំនេះ ក្នុងនាមជាភ្ញៀវ ខណៈពេលដែលប្រធានាធិបតីបារាំងលោក អេម៉ានុយអែល ម៉ាក្រុង ( Emmanuel Macron) បានចូលរួមក្នុងការជជែកដេញដោល តាមរយៈតំណភ្ជាប់ទូរស័ព្ទ។

នាយករដ្ឋមន្ត្រីស៊ុយអែត លោក Ulf Kristersson បានប្រាប់សន្និសីទសារព័ត៌មានរួមមួយកាលពីថ្ងៃពុធថា ប្រទេសនានា បានយល់ព្រមបង្កើនការគាំទ្ររបស់ពួកគេសម្រាប់អ៊ុយក្រែន ទាំងតាមរយៈការជំរុញឧស្សាហកម្មការពារជាតិរបស់អ៊ុយក្រែន និងដោយការផ្តល់នូវគ្រាប់រំសេវបន្ថែមទៀត។

នាយករដ្ឋមន្ត្រីដាណឺម៉ាក លោកស្រី Mette Frederiksen បាននិយាយថា នឹងមានការវិនិយោគផ្ទាល់ នៅក្នុងឧស្សាហកម្មការពារជាតិ នៅអ៊ុយក្រែន។ លោកស្រី បានបន្ថែមថា ជំនួយដល់អ៊ុយក្រែន មិនត្រូវប្រឈមមុខនឹងការរឹតបន្តឹងណាមួយឡើយ។

នៅពេលត្រូវបានសួរអំពីលទ្ធភាពការធ្លាក់ចុះការគាំទ្ររបស់សហរដ្ឋអាមេរិក ក្រោមរដ្ឋបាលថ្មីរបស់ លោក Trump លោក Tusk បាននិយាយថា អឺរ៉ុបគួរតែត្រូវបានរៀបចំ ដើម្បីជំនួសយ៉ាងហោចណាស់ផ្នែករបស់វា ដោយកំណត់ថា ជាឱកាសមួយ ដើម្បីបង្កើនសន្តិសុខអឺរ៉ុប។