ប៉ុស្តិ៍ទូរទស្សន៍ Al Jazeera ដែលមានមូលដ្ឋាននៅប្រទេសកាតា បានរាយការណ៍ថា កងទ័ពអ៊ីស្រាអែល កំពុងប៉ះទង្គិច ជាមួយក្រុមតស៊ូប៉ាឡេស្ទីន ខណៈពេលដែលវាយឆ្មក់តំបន់ដែលមានប្រជាជនជាច្រើន នៅតំបន់វេសបែង (West Bank)។

យោងតាមរបាយការណ៍ បានឲ្យដឹងថា ប៉ាឡេស្ទីនបានបើកការបាញ់ប្រហារទៅលើទាហានអ៊ីស្រាអែលនៅក្នុងជំរំជនភៀសខ្លួន Nur Shams នៅភាគខាងជើងនៃតំបន់វេសបែង។ ការប៉ះទង្គិចគ្នា ក៏ត្រូវបានរាយការណ៍ផងដែរ នៅជាយទីក្រុងTulkarm ។

របាយការណ៍នៃអរិភាព ក៏បានកើតចេញពីជាយក្រុងរ៉ាម៉ាឡាភាគខាងលិចដែរ។ ក្រៅពីនេះ កងទ័ពអ៊ីស្រាអែល បានធ្វើការវាយប្រហារយ៉ាងខ្លាំងក្លា នៅក្នុងទីក្រុង Hebron និង Qalqilya។

ពុំមានព័ត៌មានអំពីអ្នកស្លាប់និងរបួស នៅពេលនេះទេ។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ា នៅថ្ងៃទី ០៧ ខែតុលា ឆ្នាំ ២០២៣ នៅពេលដែលក្រុមយុទ្ធជនមកពីចលនាបដិវត្តន៍ប៉ាឡេស្ទីនហាម៉ាសដែលមានមូលដ្ឋាននៅតំបន់ហ្កាហ្សាស្ទ្រីប បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែលពីតំបន់ហ្កាហ្សា ដោយបានសម្លាប់អ្នកស្រុករស់នៅតាមព្រំដែនអ៊ីស្រាអែល និងចាប់ពង្រត់ជនជាតិអ៊ីស្រាអែលជាង ២៤០នាក់ ក្នុងនោះមានស្ត្រី កុមារ និងមនុស្សចាស់។