នគរបាលបានប៉ះទង្គិចជាមួយក្រុមបាតុករក្នុងរដ្ឋធានី ប៊ីលីស៊ី របស់ប្រទេសហ៊្សកហ្ស៊ី នៅព្រលឹមថ្ងៃសុក្រ (២៩ វិច្ឆិកា) នេះ បន្ទាប់ពីគណបក្សកាន់អំណាចរបស់ប្រទេសបាននិយាយថា រដ្ឋាភិបាលនឹងផ្អាកកិច្ចពិភាក្សាស្តីពីការចូលជាសមាជិកសហភាពអឺរ៉ុប និងបដិសេធជំនួយថវិកា រហូតដល់ឆ្នាំ២០២៨។

ក្រសួងមហាផ្ទៃហ៊្សកហ្ស៊ី និយាយថា មន្ត្រី ៣នាក់បានរងរបួស។ នគរបាលបានបញ្ជាឱ្យក្រុមបាតុករបំបែកគ្នា ប្រើកាណុងបាញ់ទឹក និងបាញ់ស្ព្រេម្រេច រួមទាំងឧស្ម័នបង្ហូរទឹកភ្នែក ខណៈក្រុមយុវជនដែលបិទមុខ ព្យាយាមវាយសម្រុកចូលសភា។ អ្នកតវ៉ាខ្លះគប់កាំជ្រួចដាក់នគរបាល ហើយស្រែកថា "ជនជាតិរុស្ស៊ី" និង "ទាសករ!"។

ទំនាក់ទំនងរបស់ហ៊្សកហ្ស៊ី ជាមួយសហភាពអឺរ៉ុបបានធ្លាក់ចុះយ៉ាងខ្លាំងក្នុងពេលប៉ុន្មានខែថ្មីៗនេះ ខណៈទីក្រុងព្រុចសែល បានចោទថា រដ្ឋាភិបាលទីក្រុងប៊ីលីស៊ី បានងាកទៅរកវិធានការផ្តាច់ការ និងអនុម័តជំហរគាំទ្ររុស្ស៊ី។ បាតុករគាំទ្រសហភាពអឺរ៉ុប រាប់ពាន់នាក់ធ្លាប់បានតវ៉ាបិទផ្លូវក្នុងរដ្ឋធានី មុនពេលមានភាពរកាំរកូសនេះចាប់ផ្តើម។

ប្លុកកាន់អំណាចនៃបក្សក្តីស្រមៃរបស់ហ៊្សកហ្ស៊ី បានចោទសហភាពអឺរ៉ុប ថា "ផ្សព្វផ្សាយការប្រមាថជាបន្តបន្ទាប់" ដោយនិយាយនៅក្នុងសេចក្តីថ្លែងការណ៍មួយថា ប្លុកអឺរ៉ុបនោះកំពុងប្រើប្រាស់លទ្ធភាពនៃកិច្ចចរចាចូលជាសមាជិកដើម្បី "គំរាមកំហែង" ប្រទេស និងដើម្បី "រៀបចំបដិវត្តន៍នៅហ៊្សកហ្ស៊ី"៕